ТӨСӨВ 2024: Иргэдэд таалагдах шийдвэрүүд ирэх сонгуульд нөлөөлөх үү?

Иргэд бодлогын шийдвэр хүсч байхад эрх баригчид өнөө маргаашийг аргацаах төсөв батлах гэж байна.

“Сант Марал” сангаас тогтмол явуулдаг судалгаагаар иргэдийн өмнө хамгийн их тулгамдаж буй асуудлыг үнийн өсөлт, ажилгүйдэл, авлигал гэж эрэмбэлжээ. Иргэд ирээдүйд амьдралын баталгааг нь бий болгох ажлын байр, шударга ёсыг эрх баригчдаас хүсч байна.  Гэтэл эрх баригч нам өнөө маргаашаа аргацаах, иргэдэд таалагдах шийдвэр гаргаж байгаа нь 2024 оны улсын төсвөөс харагдана. Тэд ээлжит сонгуулийн өмнөхөн буюу ирэх оны 4 дүгээр сарын 1-нээс ахмадын тэтгэврийг 100 мянган төгрөгөөр, төрийн албан хаагчдын цалинг 10 хувиар нэмэгдүүлэхээр төсөвт тусгаснаа танилцуулаад буй. Нэмээд гэр хорооллын айл өрхийн жорлонг эко жорлон болгож засна, сум орон нутагт соёлын төв, соёлын цогцолбор барьж, цаашлаад хууль шүүхийн барилгын их засварт тэрбум тэрбумаар нь санхүүжилт олгоно. Гэвч ажлын байр бий болгох, үйлдвэр барьж байгуулах тухай нэг үг өгүүлбэр ирэх оны төсөвт алга.

Явган алхах зам, хүүхдийн тоглоомын талбайгүй, утаа, түгжрэлтэй улсдаа ядуу тарчиг амьдарч байгаа нь харамсалтай нь бидний хийсэн сонголтын дүн. Сонгуулийн жил дөхөхөөр ард түмэнтэйгээ автобусанд чихэлдэж, аягатай цайнд нь орчих шахдаг гишүүд дарга нарт иргэдийн сайн сайхан амьдрах эсэх бус өөрийг нь сонгох санал чухал болохыг ирэх оны төсвөөр ч тэд дахин баталлаа.