14 жил царцсан “Спорт цогцолбор”-ыг барьж дуусгахад 2.5 тэрбум төгрөг зарцуулна

Улсын төсөвт он удаан жил дамнан санхүүжилт авсан спорт цогцолборын барилгууд цөөнгүй байна. Түүний нэг нь Баянзүрх дүүрэгт баригдаж байгаа мянган хүний суудалтай спорт цогцолборын барилга юм. Тус барилгыг анх 2010 онд 2.5 тэрбум төгрөгийн төсөвт өргөөр барина гэж тооцоолж байжээ. Гэтэл өнөөдөр төсөвт өртөг нь 13.5 тэрбум болж өссөн байна. Энэ төслийг дуусгахад зориулан ирэх оны төсөвт 2.5 тэрбум төгрөг суулгаж өгчээ.

Мөн Налайх дүүрэгт 700 хүний суудал бүхий “Спорт цогцолбор”-ыг 2010 онд 1.8 тэрбум төгрөгөөр төсөвлөн барьж эхэлсэн ч 14 жилийн дараа 15 тэрбум болж төсөвт өртөг нь өссөн. Ирэх оны төсөвт 526 сая төгрөгийг суулгаж өгчээ. Энэ мэт жил бүр улсын төсвөөс санхүүжилт аван дуусдаггүй төслүүд олон байгааг дурдаж болно.

Дараагийн нэг жишээ: Сонгинохайрхан дүүрэг, Найрамдал зуслангийн “Усан спорт” цогцолбор анх 2014 онд таван тэрбум төгрөгийн төсөвт өртгөөр төсөвлөгдөж байсан бол 10 жилийн дараа 17.2 тэрбум болж төсөвт өртөг нь нэмэгдсэн. Ирэх 2024 оны төсөвт 1.5 тэрбум төгрөг суулгаг өгчээ.