Алга болсон Д.Сэржмядаг охины хэрэгт Г.Гантулгыг холбоогүй гэж үзжээ

Зургаан жилийн өмнө Замын-Үүд сумаас алга болсон Д.Сэржмядаг охины хэрэгт Дорноговийн 12 настай охиныг хөнөөсөн Г.Гантулгыг холбогдуулан шалгаж байгаа гэх мэдээлэл гарсан. Тэгвэл Д.Сэржмядаг охин алга болсон хэрэгт түүнийг холбоогүй гэж үзжээ. Харин уг хэрэгт холбогдуулан 2 жил гаруй хугацаанд шалгагдаж буй сэжигтэн байгаа талаар эх сурвалж хэлж байгаа юм. 

Хэргийг эргэн сануулахад, Дорноговь аймгийн Замын-Үүд суманд оршин суух хаягтай Д.Сэржмядаг гэх найман настай охин одоогоос зургаан жилийн өмнө буюу 2017 онд ор сураггүй алга болсон. Охин одоог хүртэл  ор сураггүй байгаа юм. 

Албаныхны хэлж байгаагаар энэ хугацаанд эрлийн ажиллагааг тасралтгүй зохион байгуулж, эрлийн баг бүрэлдэхүүн хэд хэдэн удаа солигдож, шалгалтын ажиллагааг явуулсаар байгаа юм. 

Харин хэрэгт холбогдуулан охины авга ах болон түүнийг хамгийн сүүлд харсан гэх иргэдийг  шалгасан ч хэрэгт холбогдолгүй болох нь тогтоогдсон учир сулласан байдаг юм.