“Говь” ХК орон нутаг дах анхны салбар үйлдвэрээ Хэнтий аймагт байгууллаа

Хэнтий аймгийн ЗДТГ-аас томоохон бизнес эрхлэгчид, хөрөнгө оруулагчдыг урьж аймаг орон нутгийнхаа онцлог давуу талыг танилцуулах зорилгоор “INVEST KHENTII 2023” хөрөнгө оруулалтын чуулган зохион байгуулж байна.

Энэхүү чуулганы хамгийн онцлог үйл явдал нь Ноолуурын түүхий эд бэлтгэхээс эхлэн эцсийн бүтээгдэхүүн хүртэлх бүхий л шат дамжлагыг 100 хувь эх орондоо үйлдвэрлэн дэлхийн зах зээлд нийлүүлж буй Монгол Улсын тэргүүлэх компани болох “Говь” ХК-ийн анхны орон нутаг дахь салбар үйлдвэрээ Хэнтий аймагт нээлээ.
Аймаг, орон нутаг улсаас татаас авахгүйгээр өөрсдөө татвараа бүрдүүлдэг болоход хамгийн чухал алхам бол эдийн засгийн бааз суурийг тэлж, ажлын байрыг нэмэгдүүлэх, явдал юм. Энэ ч утгаараа үйлдвэр барьж байгуулах шаардлага нэн тэргүүнийх байсан тул Хэнтий аймгийн удирдлагууд тус компанийн удирдлага, төлөөлөлтэй хэд хэдэн удаагийн уулзалт, хэлэлцээр зохион байгуулж санал тавьсны үндсэн дээр Хэрлэн суманд 100-120 ажилтантай салбар үйлдвэрээ байгуулж байгаа юм.
Говь хувьцаат компани нь 1981 оны 9 сарын 5-ны өдөр үүсгэн байгуулагдсан ба хэрэглэгчдийнхээ таашаалд нийцсэн төгс загвар, чанарыг эрхэмлэн дэвшилтэд технологийг нэвтрүүлж, Монгол ноолуурыг дэлхийд таниулж буй үндэсний ууган үйлдвэрлэгч билээ.