''Хамтдаа сэргийлцгээе'' нэгдсэн арга хэмжээ эхэллээ

Нийслэлийн Онцгой байдлын газраас гал түймрийн тоо, хохирлыг бууруулах зорилгоор хэрэгжүүлж байгаа “Эрсдэлгүй Улаанбаатар” аяны хүрээнд Баянгол дүүргийн 21, 22 дугаар хороонд “Хамтдаа сэргийлцгээе” нэгдсэн арга хэмжээ эхэллээ.

Нэгдсэн арга хэмжээний хүрээнд алба хаагчид нийтийн байр болон айл өрхүүдэд гал түймэр, угаарын хийн хордлогоос урьдчилан сэргийлэх мэдлэг олгож, цахилгаан угсралт, ашиглалт, зуух яндан, сайжруулсан түлшний аюулгүй хэрэглээний зөвлөмжийг тус хороодын 52 нийтийн байр, 4317 айл өрхийн 15652 иргэнийг хамруулан шалгалт хийж, заавар зөвлөмж өгөх юм.

Нэгдсэн арга хэмжээг нийслэлийн Гэмт хэргээс урьдчилан сэргийлэх ажлыг зохицуулах салбар зөвлөл, дүүргийн Засаг даргын Тамгын газар, нийслэлийн Онцгой байдлын газар, нийслэлийн Цагдаагийн удирдах газар, хороодын Засаг дарга, Хэсгийн ахлагч нар, төвийн 6 дүүргийн Онцгой байдлын хэлтэс, Гал түймэр унтраах аврах ангиудын алба хаагчид, “Таван толгой түлш” ХХК, Агаар орчны бохирдлын хяналтын тасаг хамтран зохион байгуулж байна.