В.Болдмөнх: Хүүхдээ дагуулж гарцгүй газраар гүйдэг аав, ээжүүд анхаармаар байна, хүүхэддээ маш буруу үлгэрлэл үзүүлж байна

Монголын авто сургалтын байгууллагын нэгдсэн холбооны Удирдах зөвлөлийн дарга В.Болдмөнх: Иргэд замын хөдөлгөөний дүрэм гэдгийг зөвхөн жолооны сургалтад ирэхээрээ л мэдэж эхэлдэг. Тэр болтол огт мэддэггүй, явган хүний гарцан дээр давуу эрхтэй гэдэг л ойлголттой явдаг. Ногоон гэрлээр явна, улаан гэрлээр зогсоно гэдэг ийм л ойлголттой байна. Явган зорчигч явган хүний гарцан дээр давуу эрхтэй байлаа ч аюулгүй байдлаа хангаж, жолооч харж байгаа эсэхийг нягтлаад зам хөндлөн гарах ёстой. Гэтэл манайхан би давуу эрхтэй гээд л шууд дайрч гардаг. Ингээд л амь нас, эрүүл мэндээрээ хохироод үлддэг. Энэ асуудлыг цэгцлэхийн тулд манай Монголын авто сургалтын байгууллагын нэгдсэн холбооноос  Ерөнхий боловсролын сургуулийн багш нартай зэрэгцэж замын хөдөлгөөний аюулгүй байдлын талаарх сургалтыг бага, дунд, ахлах ангийн түвшинд орох гэж байгаа нь маш зүйтэй ажил болж байна. Манай холбоонд 600 гаруй дүрмийн багш байдаг. Эдгээрээс 325 дүрмийн багш  нь Улаанбаатар хотод бий. Манай дүрмийн багш нар ЕБС-д дүрмийн сургалт орох нь зүйтэй алхам гэж харж байгаа. Дээрээс нь эцэг эхчүүд өөрсдөө хариуцлагатай баймаар байна. Хүүхдээ дагуулаад гарцгүй газраар гүйдэг. Гэтэл хүүхдэд нь үүгээр дамжиж буруу зуршил сууж байна. Аав нь хүүхдээ машиндаа суулгаад л дүрэм зөрчөөд яваад байдаг. Энэ нь хүүхдэд нь "манай аав мундаг, сүлжээд сүлжээд л хурдан явчихсан" гэж хүүхэддээ багаас нь замын хөдөлгөөний дүрэм зөрчиж маш буруу үлгэрлэл үзүүлдэг. Бид хэдийгээр жолооны сургалтад хүмүүсийг суулгаж байгаа ч тэр хүүхдийн багаасаа эцэг эхээсээ олж авсан хандлага өөрчлөгддөггүй. Энэ хандлагыг л засахын тулд өнөөдөр ЕБС-ийн сурагч байхаас нь эхэлж замын хөдөлгөөний дүрмийн ойлголтыг олгож байна. Манай холбоо энэ ажлыг хоёр гараа өргөөд дэмжинэ.

Эрдмийн өргөө цогцолбор сургуулийн нийгмийн ажилтан Э.Уртнасан: ЕБС-ийн сурагчдад тухайлан олгодог замын хөдөлгөөний аюулгүй байдлын талаарх ойлголт өгөх хичээл хөтөлбөрт байдаггүй. Иргэний Боловсролын хичээл гэж ордог, түүгээрээ дамжуулж л төрөл бүрийн мэдлэг олгох хичээл ордог. Замын хөдөлгөөний аюулгүй байдлын талаарх хичээлийг сурагчдийн хичээлийн хөтөлбөрт суулгаж өгвөл зүйтэй гэж боддог. Сурагчдад энэ хичээлийг орсноор  зам тээврийн ослоос өөрсдийгөө хамгаалж, сэргийлж чадна шүү дээ.

Бичлэгээр үзэх: