Хөдөлмөр, нийгмийн харилцааны дээд сургуулийн 30 жилийн ой тохиож байна

Монгол улсад хөдөлмөрийн эдийн засаг, Үйлдвэрчний эвлэлийн мэргэжилтэн болон хөдөлмөр, нийгмийн харилцааны чиглэлээр мэргэжилтэн бэлтгэх зорилгоор МҮЭ-ийн холбооны санаачлага, тэргүүлэгчдийн шийдвэрээр Хөдөлмөрийн дээд сургууль нэртэйгээр тэртээ 1993 онд анх байгуулагдсан цагаас хойш даруй 30 жилийг үдэж, хөдөлмөрийн зах  зээлд олон мянган чадварлаг мэргэжилтнийг бэлтгэж, улс орныхоо хөгжилд үнэтэй хувь нэмэр оруулж байгааг дурдахад таатай байна.

Хөдөлмөр, нийгмийн харилцааны  дээд сургууль нь хөдөлмөр, нийгмийн харилцааны чиглэлээр дээд боловсролын сургалтын үйл ажиллагаа эрхэлж буй ганц дээд сургууль бөгөөд Бакалаврын түвшинд  Хөдөлмөрийн эдийн засаг, Хөдөлмөрийн аюулгүй байдал, эрүүл ахуй, Бизнесийн эдийн засаг, Хүний нөөцийн менежмент, Нягтлан бодох бүртгэл, Нийгмийн ажил, Санхүүгийн менежмент гэсэн 7 мэргэжлээр, Магистрын түвшинд Хөдөлмөрийн эдийн засаг, Хөдөлмөрийн аюулгүй байдал, эрүүл ахуй гэсэн  мэргэжлүүдээр тус тус мэргэжилтэн бэлтгэж байна.

Тус сургууль нь Монгол улсын Боловсролын хуулийн дагуу 1996 онд аттестачлагдаж,  2004, 2011, 2021 онуудад I,II, III дах шатны ахисан түвшний магадлан итгэмжлэлд тус тус амжилттай хамрагдаад байна.

Сүүлийн жилүүдэд CDIO Үр дүнд суурилсан сургалтын хөтөлбөр, Чанарын менежментийн тогтолцоо ISO 9001:2015, Боловсролын байгууллагын менежментийн тогтолцоо ISO 21001:2018 ОУ-ын чанарын стандартуудыг амжилттай хэрэгжүүлэхийн зэрэгцээ  Хөдөлмөрийн аюулгүй байдал, эрүүл ахуйн магистр, Нягтлан бодох бүртгэл, Нийгмийн ажил мэргэжлийн орой, эчнээ ангийн мэргэжлийн хөтөлбөрийг шинээр нээж  сургалтын үйл ажиллагааны чанар, хүртээмжийг нэмэгдүүлэн ажиллаж байгааг баярын энэ өдөр дурдахад баяртай байна.

Мөн үйл ажиллагааныхаа цар хүрээг өргөжүүлж, сургуулийн дэргэд Мэргэжил, сургалт үйлдвэрлэлийн төв, Нийслэлийн ерөнхий боловсролын “Эрдэм цогцлохуй” бага сургуулийг байгуулан, амжилттай ажиллаж байна.