Консулын газрын захирал Б.Болд: Талийгаач залуугийн хэргийг сэргээн шалгах хүсэлтийг БНСУ-ын Хууль зүйн сайдад хүргүүлсэн

БНСУ-руу 2016 онд ажиллахаар явсан А.Доржсүрэн гэх залуу 2021 оны зургадугаар сард гэртээ нас барсан байдалтайгаар 20 гаруй хоногийн дараа олдсон. 

Талийгаач А.Доржсүрэн нь хүлэмж угсардаг ажил БНСУ-д эрхэлдэг байсан бөгөөд захирал нь цалингаа өгдөггүй байсан талаар ар гэрийнхэн нь мэдээлж байгаа юм. Нийт 12 сая воннын цалингаа авч чадаагүй бөгөөд захирлаасаа нэхэхээр зоддог байсан гэх мэдээлэл ч бий. Ар гэрийнхэн нь талийгаачийн үхэлд Солонгос захирлыг нь сэжиглэж байгаа юм. Учир нь шүүх эмнэлгийн дүгнэлтээр " хүзүүний ясны хугаралтай" гэдэг дүгнэлт гарчээ. Харин БНСУ-ын цагдаа, прокурорын байгууллагаас талийгаачийг гадны нөлөөгүй нас баралт хэмээн хаасанд ар гэр нь гомдолтой байгаагаа мэдэгдэж хэргийг дахин сэргээн шалгаж БНСУ-ын шүүхээр оруулж өгөхийг хүсч байгаа юм.

Уг асуудлаар ГХЯ-ны Консулын газрын захирал Б.Болдоос тодрууллаа.

"2021 оны зургадугаар сард болсон хэрэг. БНСУ-ын Цагдаагийн байгууллагаас гадны нөлөөгүй нас баралт гэж үзээд хаасан. Харин Прокурорын байгууллагад нь сэргээн шалгах хүсэлт өгөхөд Прокурорын байгууллага нь сэргээн шалгах шаардлагагүй  хэрэг гэж үзсэн. Ингээд бид энэ оны долдугаар сард БНСУ-ын Хууль зүйн сайдад энэхүү хэргийг сэргээн шалгах хүсэлтийг хүргүүлсэн. БНСУ-ын Хууль зүйн сайд "манай хууль хяналтын байгууллагын дүгнэлттэй санал нийлэхгүй байгаа үндэслэлүүдээ гаргаж, ямар шалтгаанаар Солонгос иргэнийг сэжиглэж байгаа нотлох баримт, хууль зүйн үндэслэлүүдийг гаргаж өгөх" шаардлага тавьсан. Тиймээс бид ар гэрийнхэнд нь өмгөөлөгч гаргаж өгөөд хэргийн материалуудыг өгсөн. Талийгаачийн ар гэрт гаргаж өгсөн өмгөөлөгч хэргийн материалтай танилцаад санал нийлэхгүй байгаа үндэслэлүүдээ гаргах ёстой. Ингэснээр бид дараагийн алхамаа хийнэ" гэлээ.