Тодруулга: "БНСУ-д нас барсан залуугийн хэргийг дахин сэргээж шалгах хүсэлт өгсөн эсэхийг сайн мэдэхгүй байна"

БНСУ-руу 2016 онд ажиллахаар явсан А.Доржсүрэн гэх залуу 2021 оны зургадугаар сард гэртээ нас барсан байдалтайгаар 20 гаруй хоногийн дараа олдсон. 

Талийгаач А.Доржсүрэн нь хүлэмж угсардаг ажил БНСУ-д эрхэлдэг байсан бөгөөд захирал нь цалингаа өгдөггүй байсан талаар ар гэрийнхэн нь мэдээлж байгаа юм. Нийт 12 сая воннын цалингаа авч чадаагүй бөгөөд захирлаасаа нэхэхээр зоддог байсан гэх мэдээлэл ч бий. Ар гэрийнхэн нь талийгаачийн үхэлд Солонгос захирлыг нь сэжиглэж байгаа юм. Учир нь шүүх эмнэлгийн дүгнэлтээр " хүзүүний ясны хугаралтай" гэдэг дүгнэлт гарчээ. Харин БНСУ-ын цагдаа, прокурорын байгууллагаас талийгаачийг гадны нөлөөгүй нас баралт хэмээн хаасанд ар гэр нь гомдолтой байгаагаа мэдэгдэж хэргийг дахин сэргээн шалгаж БНСУ-ын шүүхээр оруулж өгөхийг хүсч байгаа юм.

БНСУ-д амиа алдсан А.Доржсүрэнгийн хэргийг дахин сэргээн шалгахад албан ёсны хүсэлтийг өгсөн эсэхийг Гадаад харилцааны яамны хэвлэлийн төлөөлөгчөөс тодруулахад "Бид уг хэрэгт бүх талаар нь дэмжиж, анхаарч байгаа. Ар гэрийг нь БНСУ руу явуулсан" гэв.  Харин хэргийг дахин сэргээн шалгахад ГХЯ-наас БНСУ-ын хууль хяналтын байгууллага руу хүсэлт өгсөн эсэхийг тодруулахад "Би сайн мэдэхгүй байна, мэддэг хүнээс нь асуух хэрэгтэй" гэлээ.

Уг асуудлаар ГХЯ-ны Консулын газрын захирал Б.Болдоос тодрууулах гэсэн боловч утсаа авсангүй.