2024 онд Хэнтий аймагт хамгийн өндөр үнийн дүнтэй шинэ төслүүд хэрэгжинэ

2024 онд улсын төсвийн санхүүжилтээр 4.3 их наяд төгрөгийн төсөвт өртөгтэй, 498 төсөл, арга хэмжээг шинээр хэрэгжүүлэхээр төлөвлөсөн. 

 Хэнтий аймагт хамгийн өндөр буюу нийт 732 тэрбум төгрөгийн төсөвт өртөг бүхий төсөл, арга хэмжээ хэрэгжүүлэхээр төлөвлөсөн бол Өмнөговь аймагт хамгийн бага буюу нийт 20 тэрбум төгрөгийн төсөвт өртөгтэй төсөл, арга хэмжээ төлөвлөгджээ.

Монгол Улсын 2024 оны төсвийн санхүүжилтээр шинээр хэрэгжүүлэх хөрөнгө оруулалтын  төсөл, арга хэмжээ, барилга байгууламжийн нийт төсөвт өртгийн дүнгээр Зам, тээврийн хөгжлийн сайд, Боловсрол, шинжлэх ухааны сайд, Сангийн сайд нар тэргүүлж байна.

Шинээр хэрэгжүүлэх барилга, байгууламжийг төрлөөр нь авч үзвэл хатуу хучилттай авто зам, цэцэрлэг, сургуулийн барилга, соёлын төвийн барилга, спорт заалны барилга, сургуулийн дотуур байрны барилга, эрүүл мэндийн төвийн барилга, дулааны станц төслийн цахилгаан хангамж, дэд бүтэц, иргэдэд үйлчлэх мэдээллийн төвийн барилга хамгийн олон төлөвлөгджээ.

Шинээр хэрэгжих хөрөнгө оруулалтын төслүүдийн төрөл, зориулалтаас харахад олон нийтийн судалгаагаар хамгийн их тулгамдаж буй асуудлуудаар тодорсон үнийн өсөлт, ажилгүйдэл, амьжиргаанд чиглэсэн төсөл, арга хэмжээ ховор байна.

Төсвийн төсөлд эхний санхүүжилтийг хуулийн дагуу төлөвлөөгүй төсөл, арга хэмжээнүүд тусгагджээ.

Монгол Улсын 2024 оны төсвийн хөрөнгө оруулалтаар шинээр хэрэгжүүлэх ижил хүчин чадалтай барилга, байгууламжуудын төсөвт өртөг  хэлбэлзэлтэй байна.