С.Чинзориг: Гадаад оронд зайлшгүй шаардлагаар эмчлүүлэх иргэдийн зардлыг үе шаттай нэмнэ

Эрүүл мэндийн сайд С.Чинзориг Засгийн газрын тусгай сангийн тухай хуульд нэмэлт өөрчлөлт оруулах тухай хуулийн төслийг УИХ-ын дарга Г.Занданшатарт өргөн барилаа. Эрүүл мэндийг дэмжих сангаас олгох санхүүжилттэй холбоотой өөрчлөлт, донорт олгох мөнгөн санхүүжилтийн талаар ЭМ-ийн сайд С.Чинзориг мэдээлэл хийлээ. 

Эрүүл мэндийг дэмжих сангаас олгож байгаа санхүүжилтийг цаашид дан ганц нийгмийн эрүүл мэндийн чиглэлийн сургалт сурталчилгаа, тандалт судалгаанд зарцуулах бус ДЭМБ-аас дэвшүүлсэн "Бүх нийтийн эрүүл мэндийн хамралтад хүрэх" зорилтыг хэрэгжүүлэхэд ашиглах хэрэгцээ шаардлага байна. Үүний тулд эрүүл мэндийн тусламж, үйлчилгээнд шинэ дэвшилтэт технологи нэвтрүүлж эх орондоо нутагшуулах, энэ чиглэлээр эмч, эмнэлгийн мэргэжилтнүүд, Багийг сургах, чадавхижуулахад шаардлагатай хөрөнгө санхүүгийн дэмжлэгийг Эрүүл мэндийг дэмжих сангаас олгодог байх нь зөв гэж үзсэн. Шинэ технологи, нутагшуулах зардлыг эрүүл мэндийн байгууллагууд өөрсдөө хариуцан хэрэгжүүлж ирсэн тул ажлын явц удаашралтай байдаг. 

Энэ хууль хэрэгжсэнээр дотоодод эмчилж чадахгүй байгаа өвчний тоо эрс буурна гэж үзэж байгаа юм. Мөн Монгол Улсад оношилж, эмчлэх боломжгүй өвчин эмгэгийн улмаас гадаад улс оронд эмчилгээ хийлгээд ирсэн иргэдийн эмчилгээний зардалд Эрүүл мэндийг дэмжих сангаас дэмжлэг үзүүлдэг байх зохицуулалтыг тусгасан. Хуульд оруулах нэмэлт өөрчлөлтөөр Нийгмийн даатгалын сангаас тэтгэмж авах эрх үүсээгүй амьгүй донорт оршуулгын тэтгэмжийг Эрүүл мэндийг дэмжих сангаас олгох зохицуулалтыг орууллаа.