ТӨСӨВ: Малчдыг НӨАТ, малын тоо толгойн албан татвар тайлагнах үүргээс чөлөөлнө

2024 оны төсвийн төсөлд малчдын татварын орчныг хялбаршуулах, НӨАТ, малын тоо толгойн албан татвар тайлагнах үүргээс чөлөөлөх замаар малын гаралтай түүхий эдийн бүртгэлийг сайжруулах, боловсруулах  дотоодын боловсруулах үйлдвэрлэлийг дэмжих, нөгөө талаас малчдын татварын орчныг хялбаршуулах зорилгоор дараах татварын арга хэмжээг авч хэрэгжүүлэхээр төлөвлөжээ. 

ҮҮНД: 
1. Малчин, мал бүхий этгээдийн борлуулсан таван хошуу мал, анхан шатны боловсруулалтад ороогүй мах, сүү, арьс шир, хонь болон тэмээний ноос, ноолуур, сарлагийн хөөврийг НӨАТ-аас чөлөөлж, суутган төлөгч болж, тайлан гаргах шаардлагагүй болгох;

2. Малчин, мал бүхий этгээдийг малын тоо толгойн албан татварын тайлан гаргах шаардлагагүй болгож, татварын хуулийг хэрэгжүүлэх зардлыг бууруулж, татварын албанаас татварын тооцооллыг шууд тооцон мэдээлж, ногдуулах;

3.Жилийн 50.0 сая төгрөгөөс дээш борлуулалтын орлоготой малчид татвар ногдох орлого, зардлаа тооцон бүртгэж, төлбөл зохих татвараа өөрөө тодорхойлон хувь хүний орлогын албан татвараа тайлагнах шаардлагатай байдгийг өөрчилж орлогын хэмжээ үл хамаарч татварын хялбаршуулсан горимд хамрагдах боломжийг нээх зэрэг болно. 

Хуулийн төсөл батлагдсанаар малчдын татварын тайлагнал, бүртгэлтэй холбоотой үүсдэг хүндрэлийг бууруулах, улмаар дотоодын боловсруулах үйлдвэрүүд НӨАТ-ын хасалтаа бүрэн хийлгэж, малын гаралтай түүхий эдийн нийлүүлэлтийг нэмэгдэх, цаашлаад малын гаралтай түүхий эдийн далд эдийн засгийг бууруулах ач холбогдолтой гэж хууль санаачлагчид үзжээ.