АН-ын бүлэг: Ковидын төсвөөр чанаргүй сонсгол хийх нөхцөл бүрдсэн тул хойшлуулсан

Өнөөдөр хуваарь ёсоор АН-ын бүлэг хуралдаж мэдээлэл хийлээ. Өнөөдрийн хурлаар иргэн Д.Мөнх-Эрдэнийн асуудлыг авч хэлэлцжээ.  Өөрөөр хэлбэр Монгол улсын шүүхээр шидэгдэж эрхээ хасуулж байгаа иргэдийн хүмүүжиж байгаа үед нь хүний эрх хэрхэн хангагдаж байна вэ? гэдэг асуудлаар тодорхой мэдээлэл авч цаашид ямар бодлого барьж ажиллах талаар ярилцсан байна. 

Хоёрдугаарт, өнөөдөр Ковидын асуудлаар нийтийн сонсгол явуулъя гэсэн байсан. Ковидын асуудал гэдэгт ганцхан төсвөөс гадна хүний эрхийн асуудал, Ковидын хуулийн хүрээнд хийгдсэн олон худалдан авалтууд, Ковидын хуулийн хүрээнд үйлчлэл нь зогссон төрийн албаны хууль гээд маш өргөн хүрээтэй асуудлын хүрээнд нийтийн сонсгол явуулъя гэж товлогдсон байсан.  Бидний зүгээс намрын чуулган эхэлснээс хойш асуулгуудыг тавьсан. Маш том асуудлууд үүний цаана байна. 

Арван их наядын хөтөлбөр дээр нэмээд хорин их наядын мөнгөн дүн бүхий асуудал яригдаж байна. Хорин их наяд гэдэг ЖДҮ-ийн 50 тэрбумтай харьцуулахад хэд болох билээ? Зөвхөн Хөгжлийн банкны сонсгол гээд бид ярьж байсан. Энэ бол нэг их наядын асуудал байсан. Хөгжлийн банкны мөнгөн дүнгээс 20 дахин их мөнгөн энд яригдаж байна. Тэр ногоон автобуснаас 60 дахин их мөнгөн дүн энд яригдаж байгаа. Ийм учраас энд ажлын хэсгийн хэдэн гишүүн суугаад дүгнэлт хийх боломжгүй юм байна.

 Шинжээч томилж өгөөч. УИХ-ын хяналт шалгалтын тухай хуулиар хянан шалгагч гэж томилоод олон тооны материал цуглуулдаг. Энэ материал дээр шинжээч ажилладаг. Хөгжлийн банкин дээр гэхэд бүтэн нэг жил ажилласан. Энэ удаад бид гуравхан шинжээчийг 10 хоног л ажиллуулъя гэсэн. Энэ бололцоог хангаж өгөөч гэсэн. Эдийн засгийн байнгын хорооны ирц хүрээгүй гэдэг шалтгаанаар хоёр долоо хоног хуралдаагүй. Энэ сонсголыг чанартай явуулж өгөөч гэсэн хүсэлт өгсөн мөн хүлээж аваагүй. Тэгээд өнөөдөр энэ сонсголын хийсэн нэр зүүгээд чанаргүй сонсгол явуулах нөхцөл байдал үүссэн учир хойшлуулах хүсэлт гаргасан.