Д.Сарангэрэл: Хүүхэд хүчирхийлсэн хүний зургийг ил нийтэлнэ гэж ярьсан атал хуульд алга

УИХ-ын чуулганы хуралдаан үргэлжилж байна. Чуулганы хуралдааны эхэнд Монгол Улсын нэгдсэн төсвийн 2024 оны төсвийн хүрээний мэдэгдэл, 2025-2026 оны төсвийн төсөөллийн тухай хуульд өөрчлөлт оруулах тухай хуулийн төслийг анхны хэлэлцүүлэгт шилжүүлсэн. 

Үргэлжлүүлэн Хүүхэд хамгааллын тухай хуулийн шинэчилсэн найруулгын төслийг хэлэлцэж  байна. 

Хуулийн төсөл батлагдсанаар хүүхэд хамгааллын үйлчилгээний түвшин, үйл явц, төрөл, хэлбэрүүдийг тодорхойлж, хүүхэд хамгаалалд зориулсан төсвийн үр ашиг, өгөөж сайжирч, хамгаалал шаардлагатай хүүхэд бүрд чанартай цогц үйлчилгээг үзүүлэх эрх зүйн орчин бүрдэх юм.

Хүүхэд хамгааллын тухай хууль хэрэгжиж эхэлснээс хойш хүүхдийн хамгаалал, хөгжлийн чиглэлээр зарцуулсан хөрөнгө 2017 онд 900.1 сая төгрөг байсан бол 2018 онд 6.4 тэрбум төгрөг, 2019 онд 7.6 тэрбум төгрөг, 2020 онд 6.4 тэрбум төгрөг, 2021 онд 8.0 тэрбум төгрөг, 2022 онд 8.0 тэрбум төгрөгт хүрч 8 дахин нэмэгдсэн.

Хэлэлцэж буй хуулийн төсөлтэй холбогдуулан УИХ-ын гишүүл асуулт асууж байна. 

УИХ-ын гишүүн Д.Сарангэрэл:  "2020 оноос эхлэн Б.Баярсайхан, С.Одонтуяа зэрэг УИХ-ын эмэгтэй гишүүд энэ хуулийг гаргах гэж нэлээн хөөцөлдсөн. Энэ хуульд ямар тодорхой өөрчлөлт орж, ямар ямар өөрчлөлт гарах талаар тооцоо судалгаа бий юу. Үр дүн гарах өмнө нь байгаагүй ямар заалтууд орсон бэ. Ерөнхий зүйл ярихгүй тодорхой байх хэрэгтэй. Тухайлбал хүүхэд хүчирхийлсэн хүний зургийг ил нийтэлнэ гэж ярьсан хаана нь орох вэ" гэдгийг тодрууллаа. 

УИХ-ын гишүүн М.Оюунчимэгийн хувьд "Хүүхэд хамгааллын чиглэлийн бүх төсвийг ХНХЯ-д тавьчихаад биднээс ажил хийхийг шаарддаг, Х.Булгантуяа гишүүн төсөвтэй холбоотой асуудлыг тодорхой яримаар байна" гэлээ.