Б.Чинзориг: Надаас болж эрх нь зөрчигдсөн шигшээ багийн тамирчдаасаа уучлалт хүсье

"Ханжоу 2022" Азийн наадмын эрэгтэй боксын 63.5 кг жинд аваргын алтан медаль хүртсэн Б.Чинзоригийн А сорьцоос допингийн төрлийн бодис илэрсэн талаар Олон улсын шинжилгээний агентлагаас мэдээлсэн. Тэгвэл Б.Чинзориг өөрийн цахим хуудсаараа "Эрхээ хамгаалахын тулд олон улсын спортын арбитрын шүүхэд хандахаар боллоо" хэмээн мэдэгдлээ.

Энэ тухай тэрбээр "2005 оноос хойш боксын спортоор 18 дахь жилдээ хичээллэж байна. Энэ жил Узбекистанд болсон ДАШТ-ээс мөнгөн медаль авсан. Хамгийн том зорилго Парисын олимп.

Энэ сард БНХАУ-д болсон "Ханжоу 2022" Азийн наадмын үеэр миний өгсөн шинжилгээнээс допингийн эсрэг дүрмийн зөрчил илэрсэнтэй холбогдуулан энэхүү бичлэгийг хийж байна. Анх энэ тухай мэдээг сонсоод шоконд орж, хэд хоног сэтгэл санаа хүнд, тогтворгүй байлаа.

Миний хувьд дэлхийн Допингийн эсрэг агентлагаас баталсан тамирчны эрхээ хамгаалах дүрмийн дөрөвдүгээр бүлэгт заасны дагуу уг хэргийг хянан шийдвэрлэх болон өмгөөлөгч авах хүсэлт тус байгууллагад тавьсан. Өөрөөр хэлбэл олон улсын спортын Арбитрын шүүхэд хандаж байна.

Надаас болж эрх нь зөрчигдсөн шигшээ багийн тамирчдаасаа уучлалт хүсье. Эцсийн шийдвэр гарсны дараа эргэн мэдээлэх болно" гэв.