МУИС, АШУҮИС, ШУТИС-ийн докторын хөтөлбөрийг төрөөс санхүүжүүлж, цалинтай докторын хөтөлбөр хэрэгжүүлнэ

Монгол Улсын топ 10 сургуулийг БШУЯ-аас зарласан. Тэгвэл эхний гуравт эрэмбэлэгдсэн МУИС, АШУҮИС, ШУТИС-ийн докторын хөтөлбөрийг төрөөс санхүүжүүлж, цалинтай докторын хөтөлбөр хэрэгжүүлэх талаар  БШУ-ы сайд Л.Энх-Амгалан хэллээ.

Тэрбээр  "Их сургуулиудын эрэмбийг зарласантай холбогдуулан ахисан шатны боловсролыг шинэ шатанд гаргах шаардлага бий. Судалгааны их сургуулийг байгуулахад магистр, докторын сургалт хамгийн чухал. Иймд эхний гуравт эрэмбэлэгдсэн МУИС, АШУҮИС, ШУТИС-ийн 20 докторантын судалгааны сургалтыг төрөөс санхүүжүүлж, цалинтай докторын хөтөлбөр хэрэгжүүлнэ" гэв.

“Алсын хараа 2050” бодлогын баримт бичиг, Дээд боловсролын тухай хууль, Боловсролын салбарын хөгжлийн дунд хугацааны төлөвлөгөөнд

• Дээд боловсролын сургалтын байгууллагын үндэсний эрэмбэ чансаа хөтөлбөрийн чанарыг цахим сангийн мэдээлэлд үндэслэн олон улсад хүлээн зөвшөөрөгдсөн үнэлгээний байгууллагатай хамтран 2 жил тутам олон нийтэд мэдээлнэ
• Олон улсын шаардлага хангасан дээд боловсролын сургалтын байгууллагын тоог нэмэгдүүлэх, чанарыг дээшлүүлэн олон улсад эрэмбэлэгдсэн, хүлээн зөвшөөрөгдсөн хөтөлбөр бүхий үндэсний судалгааны их сургуультай болох
• Төрийн өмчийн их сургуулиуд бие даасан засаглалтай болж, сургалтын байгууллагуудыг эрэмбэлж, чансаа тогтооно
• Их сургуулийг бүсчлэн хөгжүүлж, судалгааны их сургууль байгуулж төрөөс дэмжинэ хэмээн заасныг үндэслэн энэхүү эрэмбэ чансааг тогтоожээ.