Төрийн байгууллагын бүх мэдээллийг нуух гэсэн хуулийн төслийг сэтгүүлчид эсэргүүцэж, ХҮН-д шаардлага хүргүүллээ

 МСНЭ-ийн ерөнхийлөгч  Ө.Отгонбаатар:   МСНЭ бол Монгол улсад үйл ажиллагаа явуулдаг бүх хэвлэл мэдээллийн байгууллага түүнд ажиллаж байгаа ажилтан албан хаагчдын эрх ашгийг хамгаалдаг төрийн бус байгууллага. Монгол өнөөдөр 600 орчим хэвлэл мэдээллийн байгууллагад 6000 орчим хүн ажиллаж байна. Манай салбарын хувьд ажил үүргээ тайван үргэлжлүүлэхэд хүндрэл учир болзошгүй хуулийн өөрчлөлт УИХ-д орж ирлээ. Тиймээс  “Мөрдөн байцаалтын нууц задруулсан алба хаагч, ажилтанд оногдуулах ялыг чангатгах” заалтыг эсэргүүцэж байна. 

Сэтгүүлчдийн сурвалжилсан мэдээ сурвалжилгын үр дүнд хууль бус олон үйлдэл илчлэгдэж ирсэн. Хуулийн нэмэлт өөрчлөлт нэрээр бидний амыг хумих гэж байна. Эх сурвалжийг маань хумих байдлаар иргэдийн мэдэх эрхэд халдах гэж байна. Танай намын зүгээс энэ хуулийн төсөл их хурлаар орж ирэх үед дуу хоолойгоо хүргэн бидэнтэй хамтран ажиллахыг хүсэж шаардлагаа хүргүүлж байгаа юм.