МСНЭ: “Мөрдөн байцаалтын нууц задруулсан алба хаагч, ажилтанд оногдуулах ялыг чангатгах” заалтыг эсэргүүцэж байна

Мөрдөн байцаах ажиллагааны нууцыг одоо ч хадгалдаг. Чангалж байгаагийн цаана ямар сөрөг үр дагаврууд гарч болзошгүй вэ? гэдэг дээр бид анхаарч нийгэмд дуу хоолойгоо хүргэх үүрэгтэй учраас МСНЭ “Мөрдөн байцаалтын нууц задруулсан алба хаагч, ажилтанд оногдуулах ялыг чангатгах” заалтыг эсэргүүцэж байна. Хуулийн байгууллын мөрдлөг шалгалтын явцад хүний эрхийн зөрчил гардаг, алдаа гардаг. Тэр дунд хэний ч эрх зөрчигдөж болзошгүй нөхцөл байдлыг хав дарах нөхцөл бүрдэхийг үгүйсгэхгүй.

Төрийн албан хаагч албаны нууцыг задруулахдаа хувийн ашиг сонирхол гэхээс илүү нийгмийн сайн сайхны төлөө алдаа завхрал, авлига, албан тушаалын дарамтыг илчлэх зорилгоор шүгэл үлээдэг. Энэ ганц Монголд биш дэлхийн жишиг. Энэ нь сэтгүүл зүйд үнэ цэнтэй эх сурвалж болж ирсэн.

Дэлхий дахинд хэвлэлийн эрх чөлөөг ярихад "Эх сурвалж"-ийн асуудал заавал хөндөгддөг. Тэр дундаа төрийн албан дахь эх сурвалж гэдэг бол үнэ цэнтэй олон бурангуй үйл явдлыг нийтэд илчилж нийгмийг эрүүлжүүлэхэд хувь нэмэр оруулж байсан үнэн зүйл байдаг.