Тусгаар улсын түүхэн дурсгалт хөшөө газарт орох уу

1922 оны зун ардын хувьсгалын анхны баяр наадмыг Д.Сүхбаатар жанжин хийж, эгнүүлэн суулгасан бургасыг морин давхиан дунд сэлмээр хоёр талдаа алдалгүй цавчиж ард олныг цэргийн гарамгай ур чадвараараа баясган байсан түүхт газар буюу Яармагийн дэнж дээрх түүхэн хөшөөт өндөрлөг аюулд орсон учир ард иргэд хамгаалахаар нэгдэн дуу хоолойгоо биднээр дамжуулан хүргэлээ. 

Ардын хувьсгалын 25 жилийн түүхт ойг улс орон даяар тэмдэглэн өнгөрүүлэх шийдвэрийг тухайн үеийн МАХН-аас гараж байсан бөгөөд уг өндөрлөгийг 1946 онд Д.Чойдог, Н.Бельский нарын зургаар бүтээсэн байна. 2007 онд НИТХ-ын тэргүүлэгчдийн 197-р тогтоолоор тус өндөрлөгийг Хан-Уул дүүргийн хамгаалалтад авсан ч 2020 онд тухайн үеийн Байгаль Орчны Сайдын тушаалаар уг газрыг хувийн гурван компанид ашиглах эрхийн зөвшөөрөл олгосон, эргэн тойронд нь орон сууцны барилгууд баригдаж байгаа учир уг эрсдлээс хамгаалж салбарын сайд шийдвэрийг эргэн харж, цэцэрлэгт хүрээлэн болгон бүтээн байгуулалт хийх хэрэгтэй хэмээн иргэд үзэл бодлоо илэрхийллээ. Энэхүү өндөрлөг нь Хан-Уул дүүргийн 23-р хорооны нутаг дэвсгэрт байрладаг бөгөөд Байгаль орчны яамны байрнаас 400м зайд байрладаг юм.