Харааны бэрхшээлтэй хүүхдийн 116 дугаар сургуулийн багш, сурагчдын төлөөлөл Төрийн ордонтой танилцлаа

"Дэлхийн цагаан таягтны өдөр" буюу хараагүйчүүдийн эрхийг хамгаалах өдөр энэ сарын 15-ны өдөр тохионо. Цагаан таягтнуудын олон улсын өдрийг "Хараагүй хүмүүсийн олон улсын холбоо"-ны санаачлагаар анх 1979 онд тэмдэглэжээ. Энэ өдөр хараагүй иргэд өөрийн үзэл бодол дуу хоолойгоо төр засаг, олон нийтэд хүргэн, тулгамдаж байгаа асуудлуудаа хэлэлцэж, шийдвэрлэх арга замуудыг хайсаар ирсэн.

Цагаан таягтнуудын олон улсын өдрийг тохиолдуулан өнөөдөр /2023.10.12/ УИХ-ын гишүүн, УИХ-ын Хуульзүйн байнгын хорооны дарга Д.Цогтбаатар харааны бэрхшээлтэй хүүхдийн 116 дугаар сургуулийн багш, сурагчдын төлөөллийг Төрийн ордонтой танилцууллаа. 

Улсдаа ганц харааны бэрхшээлтэй хүүхдийн 116-р сургуульд 130 сурагч суралцаж байгаагаас тэдний 54 нь сургуулийнхаа хоёр давхрын дотуур байранд амьдардаг.  

 УИХ-ын гишүүн Д.Цогтбаатар өрөөнийхөө хаягийг харааны бэрхшээлтэй иргэдэд зориулсан, Брайль үсэг бүхий хаягжилтийг хийж, бусад гишүүдээ ч уриалж буй.