Х.Нямбаатар: Ажлаа аваад автобус худалдан авах үйл ажиллагааг яаралтай зохион байгуулна

Нийслэлийн ИТХ-ын ээлжит бус XV хуралдаан өнөөдөр /2023.10.12/болж байна. Хуралдаанаар Нийслэлийн Засаг даргад нэр дэвшүүлэх асуудлыг хэлэлцэж байгаа бөгөөд нэр дэвшигч Х.Нямбаатар сэтгүүлчдийн асуултад хариулт өглөө. Тэрбээр "Ногоон автобусны хэрэгтэй холбоотой эхний ээлжинд худалдан авах ажиллагааг хэрхэн дуусгавар болгох вэ гэдэг асуудал бий. Авлига албан тушаалын асуудлыг АТГ-аас шалгаж байгаа, худалдан авах тухай хуулийг зөрчиж Евро 2 стандартын автобусыг Евро 5 хэмээн илт худал хэлж авсан нь ил болсон. Өмнөх өгсөн мөнгөө хэрхэн эргүүлж авах вэ, үлдсэн мөнгөндөө ямар автобус худалдаж авах вэ зэрэг эрх зүйн асуудлууд зэрэг явах учиртай. Түүнчлэн шинээр ирсэн автобусуудыг хувийн хэвшлийнхэнд хэрхэн, ямар нөхцлөөр өгөх вэ зэрэг үндсэн гурван багц асуудал бий. Эдгээр асуудлуудыг ажлаа авсны дараа ажлын хэсэг гарган нэн яаралтай шийднэ" гэв.