Х.Нямбаатар:Би 2024 оны УИХ-ын сонгуульд нэр дэвшихгүй

Нийслэлийн ИТХ-ын ээлжит бус XV хуралдаан өнөөдөр /2023.10.12/болж байна. Хуралдаанаар Нийслэлийн Засаг даргад нэр дэвшүүлэх асуудлыг хэлэлцэж байгаа бөгөөд нэр дэвшигч Х.Нямбаатараас төлөөлөгчид асуулт асууж, хариулт авч буй. 

Энэ үеэр УИХ-ын гишүүн Х.Нямбаатар "Нийслэл Улаанбаатар хотод 33 жилийн турш тулгамдсан асуудлыг аливаа шүүмжлэлээс айхгүйгээр суурь шалтгааныг нь олж тогтоох байр суурьтай байгаа.  Цаашид бид сайжруулсан түлш ярих биш, жилд хичнээн янданг үгүй хийж гэр хорооллыг бүсчилсэн байдлаар түр орон сууцжуулах вэ гэдэг тооцоо судалгааг оны өмнө танилцуулна. Түүнчлэн хуулийн хүрээнд хилээр орж ирж байгаа автомашинуудыг хэрхэн хязгаарлаж болох вэ гэдгийг судлах хэрэгтэй байгаа. 

Миний бие Сонгинохайрхан дүүргээс сонгогдсон гишүүнийхээ хувьд ажлын тайланг улирал болгон  танилцуулдаг. Ажлаа аваагүй байхад утаа, түлш, түгжрэл гээд улстөржсөн асуулт асуумааргүй байна, төлөөлөгчдөө. Миний бие ирэх 2024 оны сонгуульд нэр дэвшихгүй. Орон нутгийн сонгуулийн бүрэн эрхийн хугацаа дуустал ажиллана" гэлээ.