Г.Занданшатар: Ялын бодлогыг чангатгаж, өршөөл уучлалд хамруулахгүй байх эрх зүйн шинэчлэл хийнэ

Улсын Их Хурлын дарга Г.Занданшатар чуулганы танхимд хэлсэн үгэндээ "Хүүхдийн эсрэг гэмт хэрэгт оноох ялын бодлогыг чангатгаж, хатуу хариуцлага тооцон ямар нэгэн өршөөл уучлалд хамруулахгүй байх эрх зүйн шинэчлэл хийх цаг болсон байна. Өдөр бүр ар араасаа сэтгэл өвтгөм хэргүүд гарсаар байна. Монгол хүүхэд гэмт хэргийн золиос болох учиргүй. Хүний наймааны 20 хэрэг бүртгэгдсэнээс 8 хохирогч нь насанд хүрээгүй хүүхэд байна. 12 настай охин алга болоод хоёр хонож байна, 13 настай охин сургуулийнхаа гадна машинд дайруулж, Дорнод аймагт 7 настай хүүхэд хойд эцгийнхээ гарт амиа алдаад байна. Түүнчлэн бага насны гурван хүүхэд ээжтэйгээ хамт угаартсан, хүүхдүүд өндрөөс унаж амиа алдсан гээд олон хэргүүд байхад төр засгийнхан анхаарлаа хандуулах зайлшгүй шаардлагатай" гэв.