"Zyle Daewoo bus" компанийн захирал нарыг цагдан хорьжээ

Өнгөрөгч Бямба гаригаас ногоон автобусны асуудлыг шалгах ажлын хэсэг АТГ-аас байгуулагдаж, улмаар Тэнүүн-Огоо ХХК-ийн А.Ганхуяг нарын дөрвөн хүнийг цагдан хориод байгаа билээ. 

Тэгвэл өнгөрөгч шөнө "Zyle Daewoo" компанийн дэд ерөнхийлөгч Ким Ки Ёл болон БНСУ-ын ачаа тээврийн Воннам компанийн захирал Лий Жон Соб , “Иктая” ХХК-ийн компанийн захирал Ким Кэебам нарыг хорих 461 рүү авч явжээ.

Гэвч тэдний нэгийнх нь бие муудаж, эмнэлэгт хүргэгдсэн байна. Одоогоор бие нь дээрдсэн гэх  мэдээлэл байна. 

"Zyle Daewoo Bus" корпорацын дэд ерөнхийлөгч Ким Ки Ёл  өнгөрөгч амралтын өдөр Монгол Улсад ирж, нийлүүлсэн автобусныхаа талаар тайлбар, мэдээлэл хийсэн. Тэрбээр энэ үеэрээ "Монгол Улсын Засгийн газар болон "Тэнүүн-Огноо" компанийн захирал Ганхуяг захирлын шахалтаас болж манай үйлдвэрийн автобусанд жижиг сажиг алдаа гаргасныг хүлээн зөвшөөрч, уучлалт гуйсан.

Одоогийн байдлаар алдаатай автобуснуудаа буцаан авч, шинэчилнэ гэдгээ зарлаж байна. Манай корпорац БНСУ-ын Хьюндэй шиг том биш ч гэсэн хуурамч мэдээллийг боловсруулсан хүмүүсийг олж, ЭСЯ-аар дамжуулан шүүх хуралд дуудна. Би Монголд анх 400 автобус оруулж ирэхэд тус корпорацын экспорт, импорт хариуцсан дарга байсан.Монгол Улсыг би их хүндэлдэг, манай улсын иргэд монголчуудад дуртай байдаг. Хэзээ ч Монгол Улсыг дээрэлхэж, чанаргүй автобус нийлүүлэхгүй, зарим жижиг сажиг алдааг гаргасан. Монгол Улсыг санаатайгаар доромжлохгүй" хэмээсэн юм.