Д.Сумъяабазар: Автобусны захиалагчийн хяналтаа дутуу хийсэн юм билээ, бухимдуулсанд уучлаарай

Нийслэлийн Засаг дарга бөгөөд Улаанбаатар хотын захирагч Д.Сумъяабазар албан тушаалаасаа чөлөөлөгдөх өргөдлөө өнөөдөр Ерөнхий сайдад өгсөн. Түүний огцрох өргөдлийг МАН-ын бүлэг дэмжээд буй юм. Тэгвэл хотын дарга Д.Сумъяабазар чөлөөлөгдөх хүсэлтээ өгсөн талаараа мэдээлэл өглөө. Тэрбээр "Би Нийслэлийн Засаг даргын ажлыг авснаас хойш гурван жилийн хугацаанд Улаанбаатар хот эрүүл засаглал, эдийн засагтай байх ёстой гэсэн зорилгоо болгож УИХ-ын гишүүнээс өөрийн хүсэлтээр чөлөөлөгдөж, иргэдийнхээ итгэлийг үргэлжлүүлэх сүүлийн 30 жилийн хугацаанд үүссэн нөхцөл байдлыг хөгжлийн зөв шатанд гаргаж онцгой анхаарахаа илэрхийлж байлаа.

Тэнүүн Огоо ХК, Эрдэм Транс ХК-тай уулзаж байгаагүй. "Ногоон автобус"-аас болж иргэдийгээ бухимдуулсан бол үнэхээр уучлалт хүсье. Сүхбаатарын талбайд ил гаргаж иргэдийн санаанд нийцэж байгаа бол хүлээж авъя, үгүй бол буцаах бодолтой байсан шүү.

Хууль хяналтын байгууллага яаралтай шалгаж, тодорхой хэмжээний эх үүсвэр зарцуулсныг шүүн тунгаах ёстой. Тиймээс хотын иргэдэд дутагдаж буй 750 автобус, хуучин автобусыг шинэ болгох гэж зүтгэсэн, захиалагчийн хяналтаа дутуу хийсэн асуудал байсан юм билээ шүү. Тиймээс иргэдээсээ уучлалт хүсч байна. Хот бол нэг хүний ажил биш нийт хүний эрх ашиг юм. 

Хотын даргын ажил үнэхээр хэцүү юм билээ шүү. Маш өргөн хүрээнд маш олон хүний ашиг сонирхол нийцсэн их зовлонтой бөгөөд хүнд ажил юм билээ шүү. Дараагийн Хотын даргаа хайрлаарай гэв.