МАН: Д.Сумъяабазар, Ж.Сүхбаатар нарыг "байцаана"

УИХ-ын намрын чуулган өнөөдөр /2023.10.02/ нээлтээ хийнэ. Намрын чуулган нээмэгц Үндэсний аюулгүй байдлын зөвлөлийн мэдээллийг хаалттай сонсоно. 

Дараа нь 12 цагийн үед УИХ дахь МАН-ын бүлэг хуралдаж, ногоон автобусны асуудлыг хэлэлцэх юм байна. Тодруулбал, үүсээд буй асуудлаар хотын дарга Д.Сумъяабазар болон Түгжрэл хариуцсан сайд Ж.Сүхбаатар нараас мэдээлэл сонсох юм байна.

Түүнчлэн Түгжрэл хариуцсан сайд Ж.Сүхбаатарыг чөлөөлнө гэх мэдээлэл байгаа юм. 

Нийслэлийн нийтийн тээврийн шинэчлэлийн хүрээнд БНСУ-ын Daewoo компанийн автобуснууд түрүүчээсээ орж ирсэн ч гэрээний  шаардлага хангаагүй, хуучин автобус оруулж ирсэн байж болзошгүй нөхцөл байдал үүсээд байгаа билээ. Өчигдөр тус компанийн төлөөлөл  БНСУ-аас Монгол Улсад ирж тайлбар, мэдээлэл өгөх үеэрээ "Монгол Улсын Засгийн газар, хотын дарга, Улаанбаатар хотын иргэдээс уучлалт гуйж, Монголоос захиалга өгөхөд манай үйлдвэр автобусаа богино хугацаанд хийсэн болохоор алдаа гаргаснаа хүлээн зөвшөөрч байна" хэмээн мэдэгдсэн. 

Өнгөрөгч шөнө автобусны хэргээр цагдан хорих 461 дүгээр хаалттай ангид дөрвөн хүнийг цагдан хорьсон. 

Тодруулбал, “Тэнүүн Огоо” ХХК-ийн захиарал А.Ганхуягийг, “Нийслэлийн худалдан авах ажиллагааны газрын хэлтсийн дарга”  Б.Түмэнжаргалыг, “Нийслэлийн худалдан авах ажиллагааны газрын төлөөлөл худалдан авах ажиллагааны хэлтсийн мэргэжилтэн Ш.Баярсүх,  “Тэнүүн Огоо” ХХК-нд гүйцэтгэх захирал албан тушаалтай Ж.Эрдэнэбат нарыг цагдан хорьжээ.