Т.Мөнхсайхан: 2023 онд 14 сая литр согтууруулах ундаа зарагдсан

Ерөнхийлөгчийн зөвлөх Т.Мөнхсайхан архи, согтууруулах ундааны хэрэглээг бууруулах төрийн тэргүүний зарлигийн хэрэгжилт, үр дүнгийн талаар мэдээлэл хийлээ.

 Тэрбээр “Монгол Улсын Ерөнхийлөгч архины хэрэглээг бууруулах тухай 43 тоот зарлигийг гаргасан. Үүний үр дүнд согтууруулах ундааны хэрэглээ анх удаа буурсан мэдээлэл байна. 2023 оны эхний найман сарын үзүүлэлтийг 2022 онтой харьцуулахад архи, согтууруулах ундааны борлуулалт хоёр сая литрээр багассан байна. 2022 онд 16 сая литр согтууруулах ундаа борлуулж байсан бол 2023 онд 14 сая литр зарагджээ.  

 Мөн бага градустай согтууруулах ундааны хэрэглээ нэмэгдэж, өндөр градустай согтууруулах ундааны хэрэглээ багассан байна. Бид жил ирэх тусам согтууруулах ундааны градусыг бууруулах бодлого барьж байгаа. 2023 онд 34-36 градустай согтууруулах ундааны хэрэглээ хамгийн өндөр байгаа бол 38 градустай архины хэрэглээ багассан.

 Архины хэрэглээг бууруулах тусгай сан байгуулахаар Ерөнхийлөгчийн зарлигт тусгасан. Тус сан байгуулагдаж, дөрвөн тэрбум орчим төгрөг төвлөрч, архи, согтууруулах ундааны хэрэглээг бууруулах, донтолт эмгэгтэй хүмүүсийн эмчилгээний зардлыг тусгаад байна. Санд төвлөрсөн хөрөнгийг үр ашигтай зарцуулж чадвал манай улсын архи, согтууруулах ундааны хэрэглээ өндөр хувиар буурах боломж бүрдэж байна" гэсэн мэдээллийг өглөө.