УУХҮЯ: Манай улс шатахууны хязгаарлалтад орохгүй ч цаашид Роснефтиэс шатахуунаа хэрхэн авах талаар албан захидал илгээнэ

Шатахууны хзягаарлалтай холбоотой асуудлаар УУХҮЯ-ны Газрын тосны бодлогын газрын дарга Б.Анхбаяр мэдээлэл хийлээ. 

Тэрбээр  "Өнгөрсөн долоо хоногийн Баасан гаригт ОХУ-ын Засгийн газраас дотоодын хэрэглээ болон үнийн өсөлтийн эсрэг авах арга хэмжээнийхээ хүрээнд газрын тосны зарим бүтээгдэхүүний экспортод тодорхой хугацаагаар хязгаарлалт тогтоож байгаа тогтоол шийдвэр гарсан. Үүнтэй холбоотойгоор Монгол Улсын өргөн хэрэглэдэг АИ 92 автобензин болон дизель түлш тасрах эрсдэл гарч магадгүй гэсэн мэдээлэл гарсан. Тэгвэл Монгол Улсад айлчилж буй ОХУ-ын Төрийн Думын дарга В.В.Володин дээрх хязгаарлалтад Монгол Улс багтаагүй гэдгийг мэдэгдсэн. Дээрх асуудалтай холбоотойгоор УУХҮЯ цаашдаа Роснефть компанитай хэрхэн хамтран ажиллах, бүтээгдэхүүнээ яаж хэвийн үргэлжлүүлэн авах талаарх албан захидлыг ОХУ-ын Эрчим хүчний яам руу илгээхээр ажиллаж байна.  Өнөөдрийн байдлаар манай улс АИ-92 автобензиний 30 гаруй хоногийн, дизель түлшний 40 орчим хоногийн нөөцтэй байна" гэлээ.