Багш нар цалингаа 1000 доллар болгохыг шаардаж ажил хаяна

Дэлхийн багш нарын баярын өдөр ирэх сарын 05-нд тохионо. Энэ өдөр Монголын багш нар цалингаа нэмэхийг шаардаж,  ажил хаялт зарлах талаар өнөөдөр /2023.09.25/  Монголын багш нарын үйлдвэрчний эвлэлийн холбооноос мэдээлэл хийлээ. 

Энэ талаар Монгол багш нарын үйлдвэрчний эвлэлийн холбооны дарга Д.Мөнхбаатар: 

Бидний зүгээс 2023 оны есдүгээр сард сайд Л.Энх-Амгаланд салбарын хэлэлцээрийг эхлүүлэх тухай мэдэгдэл хүргүүлсэн. Мэдэгдлийн хугацаа аравдугаар сарын 3-нд дуусна. Хэрвээ энэ хугацаанд хэлэлцээр эхлүүлэхгүй бол Дэлхийн багш нарын баярын өдрөөр улсын хэмжээд ажил хаялт зарлахаар бэлдэж байна. Энэхүү ажил хаялтад холбооны гишүүн 150 гаруй сургууль нэгдэхээ өнөөдрийн байдлаар илэрхийлээд байгаа.

Бид хэлэцээрт дараах саналуудыг тавьж буй. 

1. Багшийн цалинг ойрын гурван жил дотор 1000 ам.долларт хүргэх. Сүүлийн 30 жилийн дотор багшийн цалинг ам.доллартай харьцуулбал өсөөгүй. Сайдын хэлээд байгаа 2,5 сая төгрөгийг олон жил ажиллаж байгаа цөөхөн багш авч байгаа. Нийтээрээ буюу дөнгөж ажилд орсон залуу багш нар сарын 1 сая 273 мянган төгрөг буюу 350 ам.доллартай тэнцэнэ. Ямар нэмэгдэлгүйгээр гэсэн үг. Ийм цалингаар багш нар ажил хийх боломжгүй. Эхний жил буюу 2024 оны нэгдүгээр сарын 1-ээс багшийн цалинг 60 хувь нэмэгдүүлэхийг шаардаж байна. Ингэснээр 2 сая төгрөгийн босго давна. 

2. Боловсролын байгууллагын ачааны хүндийг үүрдэг үйлчилгээний ажилтнуудын цалинг хоёр дахин нэмэгдүүлэх. Тэд сард 750 хан мянган төгрөгийн цалин авч байна. Энэ мөнгөөр хүн шиг амьдрах ямар ч боломжгүй. Манай салбарын 90 гаруй хувь нь зээлтэй, өрөөс өрийн хооронд амьдарч байна. 

Багш байтугай одоо сургуулийн жижүүр олдохоо больсон. Боловсролын салбар эзэнгүйдэж байна. Багш нарын баяраар элдэв хурал хийж попролгүйгээр багш нарынхаа нийгмийн асуудалд анхаарч өгөхийг хүсч байна" гэлээ.