М.Бадарчийн Б сорьц баталгаажиж, допинг илэрсэн нь тогтоогджээ

Энэ жилийн Үндэсний баяр наадмын түрүү бөх Улсын арслан М.Бадарчийн "А" сорьцноос допинг илэрч, улмаар есдүгээр сарын 4-ний өдөр "Б" сорьцоо шинжлүүлэх хүсэлтээ өгсөн.

Улсын арслан М.Бадарч Монголын үндэсний допингийн эсрэг байгууллагад хүсэлт гаргаж, "Б" сорьцыг задлах, шинжлэх ажиллагаанд өөрийн биеэр оролцохоо илэрхийлсний дагуу тэрбээр  БНСУ-ын лабораторид өөрийн биеэр очиж, өөрийнх нь шээс мөн эсэхийг шалгаж, Б сорьцынхоо тагийг нээж шинжилгээнд оруулсан билээ.

Тэгвэл "Б" сорьцын хариу нь эерэг гарч, допинг хэрэглэсэн нь албан ёсоор баталгаажсан байна. 

Үндэсний их Баяр наадмын тухай хуулийн  18 дугаар зүйл Допингийн эсрэг үйл ажиллагаанд дараах зохицуулалтуудыг тусгажээ.

Энэ хуулийн 14.2-т заасан шинжилгээгээр бөх, сурын харваач допинг хэрэглэсэн нь тогтоогдсон бол тухайн баяр наадамд олгосон цол, чимэг, байрыг хурааж, тухайн даваанд унасан бөх, удаалсан сурын харваачид улсын цолыг нөхөн олгох саналыг зохион байгуулах хороо Монгол Улсын Ерөнхийлөгчид гаргана.

18.6.Монгол Улсын Ерөнхийлөгч энэ хуулийн 18.5-д заасан саналыг хүлээж авснаас хойш 7 хоногийн дотор улсын цол, байрыг олгохгүй байх, эсхүл хасах, эсхүл нөхөн олгох шийдвэр гаргана.

18.7.Энэ хуулийн 14.2-т заасан шинжилгээгээр бөх, сурын харваач допинг хэрэглэсэн нь тогтоогдсон бол тухайн бөх, сурын харваачийн Үндэсний их баяр наадамд оролцох эрхийг энэ хуулийн 18.4-т заасан хугацаагаар хасах саналыг салбар хороо зохион байгуулах хороонд гаргаж, шийдвэрлүүлнэ.

18.8.Энэ хуулийн 14.2-т заасан шинжилгээгээр бөх, сурын харваач допинг хэрэглэсэн нь тогтоогдсон бол тухайн бөх, сурын харваачийн дасгалжуулагчийн эрхийг хоёр жилийн хугацаанд түдгэлзүүлэх саналыг зохион байгуулах хороо эрх бүхий этгээдэд гарган шийдвэрлүүлнэ.

18.9.Энэ хуулийн 18.4-т заасан шийдвэр гарсан бол тухайн даваанд унасан бөх, удаалсан сурын харваачид улсын цол, чимгийг нөхөн олгоно.