ШӨХТГ: Банкууд аравдугаар сарын 11 гэхэд ипотекийн зээл авсан иргэдэд 1 хувийн шимтгэлийг буцаан төлөх үүрэгтэй

Арилжааны банкууд иргэдэд зээл олгохдоо зээл судалсны шимтгэл гэж иргэдийн зээлээс нэг хувийн шимтгэл авдаг. Энэ байдлыг зогсоохоор хуульчид нэгдэн банкуудыг шүүхэд өгч, шат, шатны шүүхэд ялсан. 

Улмаар "Арилжааны банкууд ипотекийн зээл олгохдоо авдаг 1%-ийн шимтгэлийг үндэслэлгүй" гэх Давж заалдах шатны шүүхийн магадлалыг Дээд шүүхээс энэ сарын 11-нд хэвээр үлдээж шийдвэрлэсэн. 

Тодруулбал “хууль ёсны ашиг сонирхолд харшлах, хэрэглэгчийг хохироох худалдааны хууль бус арга хэрэглэсэн” гэх үндэслэлээр нэр бүхий есөн банканд 20 сая төгрөгийн торгууль ногдуулсан, үр дагаврыг арилгах шаардлага хүргүүлсэн улсын байцаагчийн шийдвэрийг хууль зүйн үндэслэлтэй гэж Улсын Дээд Шүүхээс эцэслэн шийдвэрлэсэн юм. 

Уг шийдвэрийн дагуу арилжааны банкууд 2021, 2022 онд ипотекийн зээл авахдаа 1%-ийн шимтгэл төлсөн иргэдийн мөнгийг буцаан төлөх ёстой болсон.

Шүүхийн шийдвэрийг банкууд сайн дураар биелүүлэх хуулийн хугацаа одоогоор үргэлжилж байгаа. Тухайн хугацаанд банкууд шийдвэрийг биелүүлээгүй тохиолдолд Улсын байцаагчийн шийдвэрийг албадан гүйцэтгүүлэх, шийдвэрийн хэрэгжилтийг хангах үйл ажиллагааг зохион байгуулах шаардлага үүсэхийг ШӨХТГ-аас мэдэгдсэн.

  Арилжааны банкууд аравдугаар сарын 11 хүртэл шүүхийн шийдвэрийг сайн дураар биелүүлэх үүрэгтэй. Энэ хугацаанд арилжааны банкууд шүүхийн шийдвэрийг биелүүлээгүй тохиолдолд үндэслэлгүй авсан ипотекийн зээлийн 1 хувийг иргэдэд хүчээр төлүүлэх шаардлага үүснэ гэж ШӨХТГ-ын дарга С.Ням-Эрдэнэ өнгөрөгч Баасан гаригт мэдээлэв.