Д.Амарбаясгалан: WADA-гийн хурлаар манай улс "Ажиглалтын жагсаалт"-д орлоо

Манай улс ирэх онд Франц улсад болох зуны олимпын наадамд "Цагаан туг"-ийн дор оролцох эрсдэл үүсээд байгаа билээ. Уг асуудлыг энэ долоо хоногт Засгийн газрын хуралдаанаар сонсч, улмаар ЗГХЭГ-ын дарга Д.Амарбаясгалангаар ахлуулсан ажлын хэсэг байгуулсан. 

Тэгвэл WADA-гийн Зөвлөлийн уулзалт өчигдөр /2023.09.22/ БНХАУ-ын Шанхай хотноо болж, уулзалтад ЗГХЭГ-ын дарга Д.Амарбаясгалан оролцжээ. Уг хурлаар хэд хэдэн чухал асуудал хэлэлцсэний дотор Монгол Улсыг Дэлхийн допингийн эсрэг дүрмийг дөрвөн сарын дотор бүрэн биелүүлэх шаардлага тавьж, “Ажиглалтын жагсаалт”-д оруулсан байна. 

Энэ талаар ЗГХЭГ-ын дарга Д.Амарбаясгалан "Манай улс тэдгээр биелүүлэх шаардлагатай дүрмүүдийг дөрвөн сарын хугацаанд биелүүлэх боломжтой гэдгээ нотолж чадсан. Цаашид Засгийн газар, Олимп, нийтийн биеийн тамир, спортын Үндэсний хороо, Монголын Үндэсний Олимпийн хороо, Биеийн тамир, спортын Улсын хороо, Монголын Допингийн Эсрэг Үндэсний байгууллага хамтран ажиллаж, үүсээд байгаа нөхцөл байдлыг яаралтай шийдвэрлэх, эрсдэлийг арилгахад идэвхтэй ажиллах болно" гэжээ.