15 настай хүүхдийг шатаасан дөрвөн хүүхэд Дархан-Уул аймагт хулгайлах, дээрэмдэх хэрэгт яллагдагчаар татагдсан байжээ

Өсвөр насны дөрвөн хүүхэд бүлэглэн 15 настай хүүхдийг толгой, нүүр, баруун гар руу нь үсний лак шүршиж санитол шингэн асгаж шатаагаад зугтаасан хэрэг Сүхбаатар дүүргийн 6 дугаар хорооны нутаг дэвсгэрт өчигдөр /2023.09.21/ гарсан талаар бид мэдээлсэн билээ. 

Тухайн хүүхдүүд 12-14 насны хүүхдүүд бөгөөд Дархан-Уул аймгийн харьяат аж. Тодруулбал, 15 настай эрэгтэй С-ийг түүний танил болох 12-14 насны 4 хүүхэд толгой, нүүр зэрэг газарт гар ариутгагч мэт шингэн зүйл цацаж, шатаасан болохыг шуурхай эрэн сурвалжилж, илрүүлжээ. 

Урьдчилан байдлаар насанд хүрээгүй хохирогч С, холбогдогч С, М, Т, Э нар нь хоорондоо танил бөгөөд Дархан-Уул аймагт хулгайлах, дээрэмдэх зэрэг хэрэгт яллагдагчаар татагдан шалгагдаж байхдаа Улаанбаатар хотод ирж тэнүүчилдэг нөхцөл байдал тогтоогдсон аж. 

Хохирогч С нь урьдчилсан байдлаар 3-р зэргийн түлэгдэлтэй эмнэлэгийн байгууллагад хэвтэн эмчлүүлж байгаа бөгөөд Сүхбаатар дүүргийн цагдаагийн газрын нэгдүгээр хэлтсээс мөрдөн шалгах ажиллагаа хийж байна.