18 дугаар сургуулийн зургаадугаар ангийн 21 сурагч бөөлжиж, дотор муухайрсан шинж тэмдэгтэй эмнэлэгт хүргэгджээ

Нийслэлийн Хан-Уул дүүргийн 18 дугаар сургуулийн зургадугаар ангийн 21 сурагчаас бөөлжиж, суулгах шинж тэмдэг илэрч, эмнэлгийн байгууллагад 16-17 цагийн үед ханджээ. Цагдаа болон эмч мэргэжилтнүүд газар дээр нь очиж ажиллаж, ангийг битүүмжилсэн байна. 

21 сурагчийн зургаа нь зүрх дэлссэн учир /ЭХЭМҮТ/-д хүргүүлсэн бол бусад сурагчийг эцэг эхэд нь хүлээлгэн өгчээ. Хордлого юунаас болсныг тогтоохоор шинжилгээ авч байна гэж холбогдох албаныхан мэдээллээ. 

Нийслэлийн Засаг даргын орлогч З.Төмөртөөмөө: Урьдчилсан дүгнэлт гараагүй байна. Хан-Уул дүүргийн 18 дугаар сургуулийн зургадугаар анги 34 тоот ангид хичээллэж байсан, ангийг битүүмжилсэн. Ангид 54 хүүхэд хичээллэж байснаас хордлогын шинж тэмдэг илэрсэн зургаан хүүхэд ЭХЭМҮТ-д эмчилж байгаа бол бусад хүүхдийг дүүргийн Эрүүл мэндийн төвд үзлэг, шинжилгээг хийж байна. Хүүхдүүдэд хордлогын шинж тэмдэг  анх 15.00 цагийн үед илэрсэн гэдгийг хэлж байна. Эмнэлгийн байгууллагад цаг алдалгүй хандсан. Мэргэжлийн багийнхан ажиллаж байна. Дүгнэлт гарах хүртэл маргааш хичээлийг цахимаар явуулна.  "Монгол бизнес" дээд сургуулийн байранд дөрөв дэх жилдээ хичээллэж байгаа. Холбогдох байгууллагуудаас сургуулийн орчин нөхцлийг сайжруул гэж шаардлага тавьж ирсэн боловч түрээслүүлэгч тал анхаарч ирээгүй байна. Арга буюу энэ байрыг түрээсэлж байгаа.

Хан-Уул дүүргийн 18 дугаар сургуулийн захирал Д.Ган-Уяа "Хичээлийн эхний цаг буюу 13.15 минутад дуу хөгжмийн хичээл ороход янз бүрийн шинж тэмдэг илрээгүй. Дараагийн цагт технологийн хичээл орох үеэр сурагчдын дотор муухайрч байна гэж хэлэхэд нь багш нь гаргасан байна. Гуравдугаар цагт хүүхдүүдэд хордлогын шинж тэмдэг илэрч, эцэг эхчүүд цагдаагийн байгууллагад хандсан. Шинж тэмдэг илэрсэн бүх хүүхдийг эмнэлгийн байгууллагад хүргэсэн. Анхны шинж тэмдэг нь толгой нь өвдөх, бөөлжих шинж тэмдэг илэрсэн байна. Гэнэт муухай үнэр гарсан гэдгийг хамгийн хойно сууж байсан хүүхэд хэлсэн байна. Зургаан хүүхэд эмчлүүлж байна. Бусад хүүхдийн эцэг эхчүүдтэй байнгын холбоотой байна. Хүүхдүүд тайван байгаа" гэлээ.