Орхон аймаг анх удаа “Зэс фестиваль” арга хэмжээг зохион байгуулна

Энэ сарын 22,23-нд Орхон аймаг, Эрдэнэт хот уул уурхайн салбараа сурталчилж анх удаа “Зэс фестиваль” арга хэмжээг зохион байгуулах гэж байна. Монгол Улсын Засгийн газраас 2023- 2025 оныг Монголд зочлох жил болгон зарласантай холбогдуулан орон нутагт аялал жуулчлалыг хөгжүүлэх, орон нутгийн онцлогийг илэрхийлсэн хэмжээг хөгжүүлэх зорилгыг тавьсан.

Орхон аймаг орон нутгийн аялал жуулчлалыг хөгжүүлэх хэд хэдэн арга хэмжээг санаачлан зохион байгуулж  байгаагийн нэг нь энэхүү  уул уурхайгаа сурталчилсан “Зэс фестиваль” юм.

Монгол Улсын баатар “Эрдэнэт үйлдвэр” болон  орон нутагтаа үйл ажиллагаа явуулж буй боловсруулагч "Эрдмин" ХХК, "Ачит Ихт" ХХК, "Гал Сэнтий" ХХК, "Зэс Эрдэнийн хувь" ХХК зэрэг аж ахуйн нэгж байгууллагуудыг сурталчилсан олон арга хэмжээг хийхээр төлөвлөжээ.

Тухайлбал,  уурхайчдын парад алхалт, “Copper art” зэсээр урласан бүтээлийн үзэсгэлэн худалдаа, гэрэл зургийн үзэсгэлэн, үйлдвэрүүдтэй танилцах аялал,  бүтээгдэхүүнийх нь 80 хувийг бүрдүүлдэг цахилгаан машины үзэсгэлэн зэрэг сонирхолтой эвэнтүүд багтсан байна.

“Зэс фестиваль”-ийг цаашид уламжлал болгон зохион байгуулах бөгөөд орон нутаг, Монгол Улс цаашлаад дэлхийд танигдсан аялал жуулчлалын сонирхолтой эвэнт болгон хөгжүүлэх зорилготой гэж зохион байгуулагчид хэлж байна.

  Арга хэмжээний ерөнхий зохион байгуулагчаар аймгийн Засаг даргын Тамгын газар, Байгаль орчин аялал жуулчлалын газар ажиллаж байгаа бол, хамтран зохион байгуулагчаар “Эрдэнэт Үйлдвэр” ТӨҮГ болон Орхон аймагт уул уурхайн чиглэлээр үйл ажиллагаа явуулдаг "Эрдмин" ХХК, "Ачит Ихт" ХХК, "Гал Сэнтий" ХХК, "Зэс Эрдэнийн хувь" ХХК ажиллаж байна.