“Хүнс групп” мах бэлтгэлийн үйлдвэрээ байгальд ээлтэй технологиор өргөтгөж эхэллээ

“Хүнс” групп Европын стандартын чанарын шаардлага хангасан мах бэлтгэлийн үйлдвэрийг Төв аймгийн нутаг Хөшигийн хөндийд өнгөрсөн онд ашиглалтанд оруулсан билээ. Тус үйлдвэр нь түүхий эд бэлтгэн нийлүүлэх, экспортод чиглэсэн болон дотоодын зах зээлд үйлдвэрлэж байгаа махан болон хиаман бүтээгдэхүүн эрүүл, чанарын шаардлага хангасан, түүхий эд материал хэрэглэх боломжийг бүрдүүлсэн нь хүнсний салбарт томоохон дэвшил болсон юм. Тэгвэл “Хүнс” групп мах бэлтгэлийн үйлдвэрийнхээ үйл ажиллагааг өргөтгөн, байгальд ээлтэй технологийг нэвтрүүлсэн бүтээн байгуулалтын ажлыг /2023.09.14/ эхлүүлжээ.

Өргөтгөлийн хүрээнд саарал ус гаргах, цэвэрлэх байгууламжийг шинээр ашиглалтанд оруулах ажээ. Мөн 500 тн-ын багтаамжтай гүний хөргүүртэй 60000 мкв талбай бүхий малыг эрүүлжүүлэх бүсийг барьж байгуулах юм. Үүндээ олон улсын стандарттай АНУ-ын “Pentair” компанийн тоног төхөөрөмжийг ашиглана.  Ингэснээр хэрэглэсэн усаа 98 хувь хүртэл цэвэршүүлэн дахин ашиглах боломжтой гэдгээрээ онцлогтой юм.

Саарал ус гаргах цэвэрлэх байгууламжийг ашиглалтанд оруулснаар Монгол Улсын үндэсний үйлдвэрлэгч компани нийгмийн хариуцлагын хүрээнд уур амьсгалын өөрчлөлтийн үр нөлөөг багасгах, ээлтэй хот, иргэдийн оролцоог дэмжих, зохистой хөдөлмөр эрхлэлт бас эдийн засгийн өсөлтийг дэмжих зэрэг НҮБ-ын Тогтвортой хөгжлийн зорилтуудад хувь нэмэр оруулсан бүтээн байгуулалт болж буй ажээ.

Тус үйлдвэрийн өргөтгөлийг ирэх арваннэгдүгээр сард ашиглалтанд оруулахаар төлөвлөжээ.