С.Бямбацогт: Драгон төвөөс хүргэн, хадмууд орлого олдог байсан, нийтийн эрх ашгийн төлөө би ажилласан

Драгон авто вокзалыг нүүлгэсэн асуудлаар ЗТХ-ийн сайд С.Бямбацогт дараах тайлбарыг хийлээ. 

Тэрбээр "20 жил Сонгинохайрхан дүүрэгт баруун аймгууд руу автобусаар зорчих тээврийн үйлчилгээ хангагддаг байсан. Гэвч энэ үйлчилгээ нь тав тухгүй, машины зогсоолгүй, ариун цэврийн байгууламжгүй зэргээр олон жил хэл ам дагуулж ирсэн. Үе үеийн сайд нар, үе үеийн хотын удирдлагууд өнөөдрийнх шиг хэл ам болно гээд шийдэж чадахгүй, галаас зугтаж ирсэн. 

Тэгвэл энэ удаад ЗТХЯ, нийслэлийн Засаг дарга бид бүхэн хотын түгжрэлийг арилгахын тулд тодорхой асуудлыг шийдэх ёстой. Драгон авто вокзалаар жилдээ 800 мянган иргэн зорчиж байсан.Нэг хүний эрх ашгийг бус, иргэдийн эрх ашгийг нэгдүгээрт тавьж, АТҮТ-д авто вокзалын үйлчилгээг сайжруулах чиглэлийг өгсөн. Үүний дагуу АТҮТ нээлттэй сонгон шалгаруулалт зарлаж, "Номин" компанийн газар дээр үйл ажиллагаа явуулахаар гэрээ хийсэн байна лээ. Миний хувьд тэрэнтэй гэрээ хий гэж оролцоогүй. Энэ нь хууль зөрчсөн эсэхийг хуулийн байгууллага тогтооно. Драгон авто вокзалыг нүүлгэснээр үйлчилгээ сайтай, зөв шийдвэр болсон гэж олон нийт үзэж байгаа. 

Надад айж, ичээд байх зүйл алга.

Нэг хэсэг гэр бүлийнхэн хүргэн, хадмууд орлогоо алдаж байгаа учраас над руу дайралтууд хийж байгаа. Нийтийн эрх ашгийг өмнөө тавих ёстой. 

Надад хууль зөрчсөн, хулгай хийсэн зүйлгүй. Хууль зөрчсөн нь тогтоогдож, нотлогдох юм бол хариуцлагаа өөрөө хүлээе гэж өмнө нь ч би хэлсэн" гэлээ.