Н.Учрал: Эстонийн И-ресидинси хөтөлбөрийг нутагшуулна

Эстони улсад зохион байгуулагдсан "Нээлттэй засаглалын түншлэл" дээд хэмжээний уулзалтаар Монгол Улс цахим шилжилтэд манлайлж, авлигын эсрэг ил тод ажиллаж байгаа улс орноор шалгарсан талаар ЦХХХ-ны сайд Н.Учрал танилцууллаа. 

Нээлттэй засаглалын түншлэл байгууллагад дэлхийн 70 гаруй улс орон гишүүнчлэлтэй. Уулзалтаар цахим шилжилтэд манлайлж, авлигын эсрэг ил тод ажиллаж байгаа улс орныг зарлаж, Засгийн газрын үйл ажиллагааг үнэлж дүгнэн хүндэт өргөмжлөл гардуулдаг уламжлалтай.

Хөндлөнгийн үнэлгээ хийсний дагуу Монгол Улсын  Засгийн газар, Цахим хөгжил, харилцаа холбооны яам, И-Монголиа академийг "Нээлттэй засгийн түншлэл"-ийн хүндэт өргөмжлөлөөр шагнаж, цахимжилтад өндөр хувь нэмрээ оруулж байгааг бодитоор үнэлсэн. НҮБ-аас гаргадаг Цахим хөгжлийн индексээр Монгол Улс 18 байр урагшилж, 74 дүгээр байранд орсон. Энэ үзүүлэлтүүд цаашдаа авлигын индексийг бууруулахад тодорхой хувь нэмрийг оруулна. Энэ шагнал бол өнөөдөр И-Монголиа платформыг хэрэглэж буй 1.6 сая хэрэглэгч, 800 мянган иргэн тоон гарын үсгээ хэрэглэж байгаагийн шагнал гэж харж байгаа. Мөн ирээдүйд хийх ажилд том хариуцлага хүлээгдэж байна. Засгийн газраас "5 Ш" ажиллагааны хүрээнд Шилэн ажиллагааг явуулж, үлгэр загвар болох бодлогыг олон улсад өндрөөр үнэлж байна.

Өнгөрсөн хугацаанд Шилэн нээлттэй мэдээллийн нэгдсэн санд 750 мянган мөр өгөгдлийг байршуулж, хуульд заасан 68 мэдээллийг ил тод хэрэглэх боломжийг хангасан. Цаашдаа машинд уншуулах байдлаар том дата хэлбэрээр боловсруулж, хувийн хэвшил болон төрийн байгууллага ашиглах боломжийг хангахаар ажиллаж байна. 

Мөн монгол хүний уураг тархиар бүтсэн олон программ бүтээсэн манай салбарын 2000 гаруй инженерүүдийн хамтын бүтээлийг өндрөөр үнэлсэн шагнал байлаа" гэв.