"Өдөр нь эв эрүүл цэрэгт явсан хүү минь орой нь сохор, дүлий болоод ирсэн

2003 оны арваннэгдүгээр сарын 02-нд Төв аймгийн Сэргэлэн сумын 016-р цэргийн ангид 18 настай А.Ууганбаяр нь хуваарилагдан явжээ. Очсон өдөр нь 4 хал цэрэг мөнгө нэхэж,  тэлээнийхээ төмрөөр нүүр нүдгүй цохиж, тархины арын яснуудыг нь цөмөлсөн байна. Зодсон цэргүүд “чи хүмүүст бид нарт зодуулсан гэж хэлээд үзээрэй, өөрөө унаж татдаг юм гэж аргалаарай” гэжээ.

"Хүү нь цэргийн хүн болно оо гээд” ээж, эмээдээ үнсүүлээд цэрэгт явсан хүү орой нь нүд нь сохорч, сонсголгүй болжээ

18-хан насандаа цэрэгт явж, халагдаж ирээд бөх болох зорилготой байсан хүү 20 жил сонсголгүй, хараагүй тарчилж амьдарч байна.  Ээж нь эв эрүүл цэрэгт татагдсан хүүгийнхээ гомдлыг нэхэж цэргийн анги дээр нь очтол “цэргийн нэр хүнд унагаалаа” гэж хэлээд ангийн захирагч нь зодож, өргөдлийг нь ураад хөөсөн байна. 

Хүү А.Ууганбаяр нь өрх толгойлсон эмэгтэйн ганц хүү. А.Ууганбаярыг зодож сохор, дүлий болгосон 4 цэрэг өнөөдөр сул чөлөөтэй, зарим нь гадаадад амьдарч байна.  20 жилийн хугацаанд ганц шүүх хурал болж тэр шүүх хурлаар ямар ч ял шийтгэл төлөвлөөгүй байсаар хэрэг нь хөөн хэлэлцэх хугацаа нь дууссан гэж хаагджээ.