Б.Ганхуяг: Намайг гаргавал маш олон хүний зүрх нь зогсох учраас тэд айж байгаа

Нүүрсний хулгайн хэрэгт нэр холбогдож, яллагдагчаар татагдсан УИХ-ын гишүүн асан, ХНХ-ын сайд асан Т.Аюурсайхан, "Эрдэнэс тавантолгой" ХК-ийн гүйцэтгэх захирал асан Б.Ганхуяг нарын 11 хүнд холбогдох хэргийн шүүх хурлын урьдчилсан хэлэлцүүлэг тодорхойгүй хугацаагаар завсарлалаа. 

Учир нь яллагдагч Б.Ганхуяг дахин нийт шүүгч нараас татгалзах санал гаргаснаар, хүсэлтийг шүүгчдийн зөвөлгөөнөөр шийдвэрлэхээр тодорхойгүй хугацаагаар завсарлав.

Тэрбээр хурлын эхэнд "Би зарчмын юм ярьж байгаа. Шүүхийн хараат бус байдал ялангуяа тунгалаг байх зарчмыг ярьж байгаа. Барьцаалагдаагүй байх, хонгилын шүүгч нар гэж яриад л байсан. Одоо барьцаалагдсан шүүгч нарын асуудал яригдах нь. Гуравхан зүйлийг би ярьж байгаа. Би хүсэлтээ тавьж байгаа учраас үгээ хэлэх эрхтэй. Нэгдүгээрт АТГ-аас лавлагаа бичиг аваач ээ. Шүүгч нь барьцаалагдаагүй гэдгийг би яаж мэдэх юм бэ. Өнөөдөр есөн сар намайг хорилоо. Дахиад л Ганхуягийг гаргахгүй юм байна. Гаргаж ард түмэнд үгийг нь  сонсгохгүй юм байна.  Энд намайг байлгасаар л байх сонирхолтой хүмүүс цаана нь хэвээрээ байсаар л байна. Энэ бичиг, лавлагаа ирснээрээ юунд хэрэгтэй вэ гэхээр танд бас хэрэгтэй. Та сошилоор намайг ингээд байна гэж ярих бус харин АТГ-аас ирсэн лавлагааг харуулаад би асуудалгүй ээ гээд сууж байх ёстой. Та, бид хоёр энэ нөхцөлд адилхан болчихоод байна. Надад тэр лавлагаа хэрэгтэй. Шүүхийг барьцаалагдсан байгаасай гэж би хүсэхгүй байна. Энэ ядаж бичгийг харчихаад би үгээ хэлмээр байна. Чингэлтэй дүүргийн нийт шүүгчдээс би  татгалзаж байна. Хэрэв энэ бичиг ирсэн тохиолдолд би итгэнэ. Би хилс хэрэгт хэлмэгдмээргүй байна. Надад зургаан үйлдэл байгаа. Зургаан хүн танилцуулсан. Миний танилцуулсан хүн болгоны хүүхдэд гэрчилгээ байвал над дээр биччих. Би тэгээд ялыг нь үүрээд л явья. Шүүгч Б.Халиун таныг золиосолж байна. Улс төрийн золиос болгочихлоо наадуул чинь. Бид энд золиослогдоод тэд тэнд Засагтайгаа, тамгатай, төртэйгээ үлдэж болохгүй. Ямар ч нүүрсгүй нүүрсний хэрэг.Ард түмнийг хулхидаж жагсаалыг тараасан шдээ. Энэ эзнийг барьчихлаа гэсэн мөртлөө 40 их наядын нүүрсний хулгай гэж баахан юм ярьж ярьчихаад над дээр болохоор жагсаал гэж оруулж ирээд одоо энэ 11 хүнд холбогдох хэргийг та нар уншаарай. 

Гүйдэг хаалганы хэрэг, модон хашааны хэрэг, чирдэг жорлонгийн хэрэг гээд яах гэж байгаа юм, тэрийг ард түмэнд жорлонгийг нь хураалаад гээд өөрсдийгөө аврах гэж байгаа юм уу. Үүнд итгэдэг ард түмэн гэж байхгүй. Би итгээд үгээ хэлмээр байна. Нүүрсний том том төслүүд нь хаана байгаа юм бэ, энэ төслүүдийн ард байгаа эзэд нь хэн юм, Аюурсайхан юм уу. Аюур биш. Энэ хүн энд юу хийж суугаа юм бэ. Надтай хальт найзалсны төлөө энд ирээд сууж байгаа бол бүгдийг нь аваад ир. 76-уулаа сууя хэдүүлээ. Нүүрсний сүртэй яригдаад байсан нууц гэрээ, нүүрсний тээвэр, хил, гааль энэ бүхэн хаана байгаа юм бэ. Би АТГ-т бүгдийг нь хэлсэн, одоо хаана байна. Надад жорлонгийн хэрэг тохонгуутаа өөрсдөө тэнд ард нь үлдэх гээд байгаа юм уу. яагаад гэвэл би энэнд нь хамааралгүй. ЭЗХ-ийн сайд Ч.Хүрэлбаатар өнөөдөр БНСУ-д орд зарсныхаа хариуд явуулсан мөнгөө над дээр бичээд явах юм уу, тэгвэл бүгдийг нь бичээд аваад ир. Эцэггүй хүүхдүүдийн нэрийг над дээр бас биччих. Би итгэдэг шүүгч нараа яримаар байна.

Би 2017 оноос хойш энэ компаниад ажилласан. Надаас өөр нүүрс мэдэх хүн байхгүй. Надгүйгээр яагаад УИХ дээр нүүрсний хэргийг яриад байгаа юм бэ. Намайг жагсаалаар оруулж ирсэн. Тухайн үед 68 хүн баригдсан атал одоо би ганцаараа байна. Дахиад ч байлга, би байж л байна. Яагаад гэвэл намайг гаргах юм бол маш олон хүний зүрх нь зогсох гээд байна. Би АТГ-т ярьсан атал энд алга. Тиймээс би итгэхгүй байна. Миний араас маргаашнаас ярих хүмүүс жинхэнэ хулгайч нь шүү. Засаг төр, нам төртэйгөө намайг мууллаа. Есөн сарь хорьчихоод надаас ганц мэдүүлэг аваагүй. Тамгатай төртэй үлдэхийн тулд явж байгаа жүжгийг чинь би мэдэж байна. Хоёр талаасаа адилхан жүжиг найруулья. Би энэ улсаас, уурхайчдаас нэг ч төгрөг хулгайлаагүй. Би үнэнчээрээ явсаар байгаад дуусна, та нар намайг яаж ч ялласан би нэг ч хэрэг хүлээхгүй, хийгээгүй хэргийнхээ төлөө" гэлээ.