Цахим орчинд мөрийтэй тоглоом зохион байгуулсан этгээдүүдийг 3-6 сая төгрөгөөр торгожээ

Сүхбаатар дүүргийн долоодугаар хорооны нутаг дэвсгэрт өнгөрсөн оны арванхоёрдугаар сарын 15-нд иргэн Д нь бусадтай бүлэглэн цахим орчимд хууль бус мөрийтэй тоглоом зохион байгуулсан хэргийг цагдаагийн байгууллага илрүүлээд буй. Эрүүгийн хуулийн тусгай ангийн 20.17 дугаар зүйлийн нэг дэх хэсэг мөн хуулийн 18.6 дугаар зүйлийн нэг дэх хэсэгт зааснаар мөрдөн шалгах ажиллагаа явуулжээ. Улмаар уг хэргийг энэ оны зургаадугаар сарын 18-нд шүүхэд шилжүүлсэн байна. 

Тус дүүргийн шүүхээс ердүгээр сарын 1-нд шүүгдэгч Д-г Эрүүгийн хуулийн 20.17 дугаар зүйлийн 1, 18.6 дугаар зүйлийн 1 дэх хэсэгт заасан гэмт хэргийг үйлдсэн, гэмт буруутайд тооцон зургаан сая төгрөг, гэмт хэргийг хамтран үйлдсэн Б, П зэрэг таван этгээдэд мөн хуулийн 20.17 дугаар зүйлийн 1 дэх хэсэгт зааснаар гэм буруутайд тооцон тус бүр гурван сая төгрөгөөр торгох ял оногдуулжээ. 

Эрүүгийн хуулийн 20.17 дугаар зүйл нь хөнгөн хэлбэрийн төдий торгуулийн ял оногдуулах зохицуулалттай байгаа нь уг гэмт хэргээс урьдчилан сэргийлэх үр дүнтэй хариуцлагын арга хэмжээ, шийтгэл болохгүй байна. Мөрийтэй тоглоом зохион байгуулагчдын хоногт эргэлдэж байгаа хууль бус мөнгөн дүн тэрбум байхад торгуулийн ял нь ийм байна гэдэг нь энэ хуулийн энэ төрлийн гэмт хэргийн ял шийтгэлийг дахин эргэж харах шаардлагатай болохыг харуулж байгаа юм