Б.Ундраа: Хүүхдээ харж байгаа эхнэрээ "чи минь сайн байгаа шүү" гээд тэврээд тайтгаруулчихдаг мэдрэмжтэй эр хүн олон байгаасай

“Би нөхөр, хоёр хүүхдийн хамт амьдардаг. Хүүхдээ хараад гэртээ байгаа ээжүүддээ “чи ханьтай шүү” гэдэг мэдрэмжийг өгөхийн тулд контент хийгээд нэг жил болж байна. Миний таван настай хүү утсаар маань бичлэг хийж өгч, миний зураглаачийг хийж өгдөг. Би эхний төрөлт дээрээ хүчтэй сэтгэл гутралд орж байсан. Хоёр дахь төрөлт дээрээ дуртай юмаа хийж эхлээд, юм бүхэнд нөхөртөө гомдоллох хэрэггүй юм байна гэдгийг ойлгосон. Гэхдээ нөхрүүд төрөөд гэртээ байгаа эхнэрээ хачин аашилахад нь ойлгоод “ чи минь мундаг байгаа шүү” гээд тэврэхэд л сэтгэл нь сайхан болдог. Гэтэл зарим нөхрүүд хачин аашилахад нь дургүйцэж, төвөгшөөгөөд гомдоох үг чулууддаг. Хүүхдээ төрүүлээд удаагүй байгаа эмэгтэйчүүд шөнөжин хүүхдээ хөхүүлж, унтуулах гэсээр нойр дутуу стрессдэж, зарим нь сэтгэл гутралд ордог. Энэ үедээ хажууд байгаа хүнээсээ зүгээр л хайр хүсч хачин аашилж байгаа гэдгийг нөхрүүд нь ойлгодог байгаасай. Эмэгтэйчүүд тийм олон юм хүсдэггүй, хайр дутаад ирэхээр л юу хүсээд байгаа нь мэдэгдэхгүй аашилдаг. Болдог бол сэтгэлээр унасан, халамжаар цангасан ээжүүдээ нөхрийнх нь өмнөөс “ мундаг байгаа шүү” гэж хэлээд тэвэрмээр санагддаг. Эхнэрээ хайрлаж, хачин аашилахад “аан хайр, халамж л хүсээд байгаа юм байна шдээ гээд ойлгочихдог мэдрэмжтэй нөхрүүд олон байгаасай". Түүнийг Б.Ундраа гэдэг. Хоёр хүүхдийн ээж контент бүтээгч. 

Бичлэгээр үзэх: