“Халзан бүргэдэй" ордыг нутгийн иргэдийн саналд үндэслэн, ашиглах эсэхийг шийдэхээр Засгийн газраас шийдвэрлэлээ

Засгийн газрын хуралдаанаас гаргасан шийдвэрийг танилцуулж байна. Уул уурхай, хүнд үйлдвэрийн сайд Ж.Ганбаатар дараах мэдээллийг өглөө

 "Ховд аймгийн Мянгат сумын нутаг дэвсгэрт орших Халзан бүргэдэй ордод хамаарах хоёр тусгай зөвшөөрлийг хууль тогтоомжийн дагуу цуцалж, орон нутгийн ард иргэдийн саналыг харгалзан шийдвэрлэхийг Уул уурхай хүнд үйлдвэрийн сайд Ж.Ганбаатар, БОАЖ-ын сайд Б.Бат-Эрдэнэ нарт даалгалаа. Халзан бүргэдэй орд дээрх хоёр тусгай зөвшөөрлийг Монголиан Нейшнл Рийр Ийрт ХХК эзэмшдэг.  Монголиан Нейшнл Рийр Ийрт компанийн 100 хувийн хувьцааг Худалдаа хөгжлийн банк эзэмшиж байна. Анх лиценз олгогдсон хугацаа 2001, 2004 он байна. Улсын бүртгэлд газрын ховор элемент гэсэн ангилалаар бүртгүүлсэн. 268 сая тонн хүдэртэй томоохон хэмжээний орд газар. УУХҮЯ-аас 2023 оны дөрөвдүгээр сарын 29-ний өдөр дотоод хяналт шалгалт явуулаад энэ уурхайн үйл ажиллагаа түр зогсоох тухай улсын байцаагчийн акт гарсан. Байгаль орчны менежментийн төлөвлөгөөг батлуулаагүй гэх мэт зөрчлүүдтэй байсан ч үйл ажиллагаа нь үргэлжилж байсан байсан учраас өнөөдрийн Засгийн газрын тогтоол гарлаа" гэлээ.