С.Бямбацогт: Төрийн албаны машины дугаарыг хөх өнгөөр ялгана, ингэснээр өдөржин сэлгүүцдэг байдал арилна

Төрийн болон орон нутгийн өмчид бүртгэлтэй тээврийн хэрэгслийн улсын дугаарын дэвсгэр өнгө солих талаар Зам, тээвэр хөгжлийн сайд С.Бямбацогт мэдээлэл хийлээ. 

Тэрбээр "Төрийн авто машинаар дарга нар хүүхдүүдээ сургууль, цэцэрлэгт нь зөөдөг, өдрийн цагаар дэлгүүр хоршоогоор явж , тэр ч бүү хэл орой үдшийн цагаар бар цэнгээний газраар зэрэг олон шүүмжлэл дагуулдаг. Тиймээс ард иргэдэд нээлттэй ил тод байх үүднээс төрийн авто машины улсын дугаарыг хөх өнгөөр ялгаж өөрчилж байна. Түүнчлэн ингэж ялгаснаар авто замын түгжрэлийг бууруулахад ач холбогдолтой. Бид хамгийн бага зардлаар уг ажлыг хийнэ. Төрийн автомашинаар хувийн ажлаа амжуулахаа больвол зардал танагдаж бензин, түлшний зардал буурах ач холбогдолтой " гэв.