​Натур орчимд буун дуу гарсан гэх хэргийн талаар ЦЕГ-аас мэдээллээ

Наймдугаар сарын 7-ны өдрийн 21 цагийн орчимд Цахим тоглоомын газар бусдад хутгалуулсан гэх дуудлага цагдаагийн байгууллагад иржээ. Дуудлагын дагуу очиход 33 настай иргэний биед 39 настай эрэгтэй халдаж, хэргийн газраас зугтсан байжээ. Цагдаагийн эргүүлээс эрэн сурвалжлах ажиллагааг явуулж, 30-40 минутын дараа хэргийг үйлдэж, зугтсан сэжигтэн Б-г олсон байна.

Сэжигтэн Б нь хоёр гартаа хутга барьж, хутгаа гараараа скочидсон байсан бөгөөд цагдаагийн ажилтан шаардлага тавихад "Би шийдсэн" гэх мэтээр шаардлагыг үл хүлээн авчээ. Улмаар цагдаагийн байгууллагаас хүч нэмэгдүүлж очсон байна. Ийнхүү 2 цагийн хугацаанд сэжигтэн Б-тэй хэлэлцээр хийж, ярилцсан ч нөхцөл байдал хүндэрсэн учир, цагдаа резинэн сумтай буу хэрэглэж, үйлдлийг нь таслан зогсоосон ажээ. Эхний удаа анхааруулж хий буудаж, дараа нь сэжигтэн Б-гийн зөөлөн эд рүү хоёр удаа буудсан байна.
Сэжигтэн "Б" нь 2020-2021 онд 5 удаагийн ял шийтгэлтэй, мансууруулах бодис зөөвөрлөж, тээвэрлэсэн гэх хэрэгт холбогдож байсан, мөрдөн шалгах ажиллагаа үргэлжилж байгааг ЦЕГ-аас мэдээллээ.