Өвөрхангай-Баянхонгор-Алтай чиглэлийн авто зам усанд автжээ

Нарийн гүүрийн хөдөлгөөнийг түр хаасан тул тус чиглэлд зорчихгүй байхыг анхааруулж байна

Улсын чанартай А0303 дугаартай Баянхонгор-Говь-Алтай чиглэлийн авто замын зорчих хэсгийн 189 км-ээс буюу Нарийн гүүрийн хөдөлгөөнийг 08 дугаар сарын 02-ны 07:30 цагийн байдлаар түр хаасан хэвээр байгаа тул тус чиглэлд зорчихгүй байхыг анхааруулж байна.
Нарийн гүүрийн хоёр талын чулуун бэхэлгээ эвдэрсэн, хөвөө хучилтын ирмэгт тулж урсснаас болж авто замын зорчих хэсэг нурж нарийсан. Үүний улмаас Баянхонгор чиглэлийн талаас суудлын 30 автомашин, 3 автобус, ачааны нэг автомашинд нийт 120 орчим иргэн боогдсон байдалтай байна.

Мөн улсын чанартай авто замын А0302 дугаартай Өвөрхангай-Баянхонгор чиглэлийн 7-8 км,  13-14 км хооронд уулын үер бууж зам дээгүүр ус давж үерлэжээ.  Үерийн ус одоогоор татраагүй, аймгийн онцгой байдал, замын цагдаа болон “Өвөрхангай АЗЗА” ТӨХК-н баг бүрэлдэхүүн хамтран үерт суусан авто машиныг татаж гаргах, суусан машины зорчигч нарыг аймаг руу шилжүүлэх ажил хийгдэж байна.