​ “TRIO” кино 4 тивийн 11 улсаас 14 дэх навчаа авлаа

“TRIO” кино 4 тивийн 11 улсаас 14 дэх навчаа авлаа. “TRIO" кино 9 сард болох 26 дахь удаагийн Италийн "Religion Today Film Festival"-д албан ёсоор сонгогдож, ээлжит навчаа хүлээн авлаа. Ийнхүү "TRIO" уран сайхны кино Америк, Канад, Франц, Итали, Египт, Солонгос, Энэтхэг, Польш, Эстони, Тайланд, Монгол зэрэг 4 тивийн 11 улсаас 14 дэх навч, шагналуудын хур буулгасаар байна.

Official Laurel RTFF 2023 

Энэхүү олон улсын кино наадам нь хүний амьдралын утга учир, мөн чанар, зорилгыг кино урлагаар дамжуулан нийгэмд улам сайн хүргэх, дэлхий дээр байгаа ялгаатай олон шашны филисофи, үүсэл гарал, утга учрыг энгийнээр тайлбарлах, хүн хүнээ хайрлах, байгаль дэлхийгээ дээдлэх, эв нэгдлийг эрхэмлэх, бие биенээ арьс өнгө, үзэл суртал, шашин, итгэл үнэмшил, ямар нэг ялгаатай байдлаар нь дээрэлхэх, нийгмийн цөөнхийг ялгаварлан гадуурхах, хүний эрхийг нь зөрчих ёсгүйг ухааруулах зорилготой ажээ.

Ялангуяа энэ жилийн хувьд дайн байлдаан, цар тахал, цахим хуваагдал гээд хүний эрхтэй холбоотой том сорилтууд дунд наадмаа улам утга төгөлдөр хийхээр бэлдэж, EXPLORING THE DIFFERENCES буюу ОНДОО ТАЛУУДАА ОЛЖ НЭЭЕ уриа дор хийнэ гэдгээ зохион байгуулагчид имэйлдээ дурджээ. Намар "TRIO" кино Адриатын тэнгисийн хаяан дор Италийн премьерээ хийх нь ээ.