Ц.Хуланд 9 жил 6 сарын хорих ял оноолоо

Сүхбаатар дүүргийн Эрүүгийн хэргийн анхан шатны шүүхээс Ц.Хуланд холбогдох хэргийг гурван өдөр хэлэлцээд гэм буруутайд тооцож, дөнгөж сая ял оноох шийдвэрээ танилцууллаа.

Яруу найрагч Ц.Хуланд холбогдох хэргийг хянан хэлэлцээд түүнд 9 жил 6 сарын хорих ял оноолоо. Мөн түүнтэй хамт шүүгдэж байсан лам Б.Отгонбаатарт 8 жилийн хорих ял оноож, тус тус нээлттэй хориход эдлүүлэхээр шийдвэрлэв.

Яруу найрагч Ц.Хуланг Эрүүгийн хуулийн 19.4 дүгээр зүйлийн 1-д зааснаар "Монгол Улсын иргэн гадаад улсын тагнуулын албатай хамтран ажиллахаар тохиролцсон, хамтран ажилласан; гадаадын байгууллага, иргэнд шилжүүлэн өгөх зорилгоор төрийн нууцад хамаарах мэдээ, баримт, эд зүйлийг хулгайлсан, цуглуулсан, хадгалсан, дамжуулсан" гэсэн үндэслэлээр шүүсэн юм.

Уг гэмт хэрэгт 8-15 жил хүртэл хугацаагаар хорих ял шийтгэнэ гэж хуульд заасан байдаг. Харин прокуророос Ц.Хуланд 12 жилийн хорих ял төлөвлөөд байсан. Харин шүүх хэргийг хянан хэлэлцээд 9 жил 6 сарын хорих ял оноожээ.