ОБЕГ: Үерийн аюулаас сонор сэрэмжтэй байхыг онцгойлон анхааруулж байна

Цаг уурын байгууллагын ирүүлсэн мэдээгээр Хөвсгөлийн уулсаас эхтэй Бэлтэс голын усны түвшин өмнөх өдрийнхөөс 105 см нэмэгдэж, үерийн түвшинг 80 см даван үерлэж байна. Сэлэнгэ мөрөн Орхон голын адгаар усны түвшин өмнөх өдрийнхөөс 5 см нэмэгдэж, үерийн аюултай түвшинг 5-45 см давсан хэвээр байна. Хараа гол Дархан хот, Ерөөгол Ерөө сум орчимд үерийн түвшинг 40-70 см, Дулаанхаанаар Ерөө гол үерийн аюултай түвшинг 25 см, Туул гол Лун сум орчимд усны түвшин өмнөх өдрийнхөөс 10 см нэмэгдэж аюултай түвшинг 5 см тус тус давсан байдалтай байна. Мөнгөнморьт, Өндөрхаан сум орчмоор Хэрлэн голын усны түвшин өмнөх өдрийнхөөс 10 см нэмэгдэж, Мөнгөнморьт сумаар үерийн аюултай тувшинг 5 см даван үерлэж байна. Онон гол үерийн аюултай түвшинг 20 см, Халх гол үерийн түвшинг 40 см давжээ. Маргааш буюу 7 дугаар сарын 13-нд Дэлгэрмөрөн голын усны түвшин 50 см нэмэгдэж, үерийн түвшинг даван үерлэх төлөвтэй байна. Өнөө маргаашдаа төв болон зүүн аймгуудын зарим нутгаар түр зуурын бороо орох тул тухайн хугацаанд орсон хур борооны эрчимшил хэмжээнээс шалтгаалан гол мөрний усны түвшин улам нэмэгдэх, хуурай сайр гуу жалгаар уруйн үер буух нөхцөл бүрдэнэ.

Иймд дээрх голууд болон гол мөрний сав дагуу суурьшиж, нутаглаж байгаа ард иргэд, аж ахуйн нэгж байгууллага, аялж, амарч, зугаалж яваа иргэдийг үерийн аюулаас сонор сэрэмжтэй байхыг онцгойлон анхааруулж байна.