Хөдөөний айлаас: "Би малчин болоод гурван охин дүүдээ идэшийг нь явуулна, бага дүүдээ байр авч өгнө"

“Аймагт сургуульдаа явахаар хэдэн малаа үгүйлээд тогтож чаддаггүй юм. Өглөө 05:30 гэж босоод эмээдээ тугалыг нь татаж өгчихөөд, адуундаа мордох сайхан. Би малчин бас бөх болно гэж боддог. Малчин болоод гурван охин дүүдээ өвлийн идэшийг нь явуулна. Би ч хоёр охин дүүгээ авч явж барахгүй юм аа гэхэд гурван настай охин дүүгээ бол аваад л явчихна аа. Хотод байр майр авч өгөөд л харж хандана шдээ” хэмээн 15 настай Доржсамбуу цавгаа татангаа ярина. Доржсамбуу айлын том хүү, 3-13 насны гурван охин дүүтэй. Тэднийх сум, хөдөөг хоршуулан амьдардаг. Дөнгөж гэрээ нүүлгээд ирж байхад нь бид очив. Эмэгтэй дүү нар нь үхэр малаа сааж, цагаан идээгээ боловсруулна. Дунд дүү Үржинбадам ЭЕШ-даа 800 оноо аваад Урлагийн их сургуульд бүжигчин мэргэжлээр суралцах мөрөөдөлтэй. “Гурван бор үхрийг би саадаг. Бусад үхрээ эмээ саадаг юм өө. Том эгч одоо наадмаас өмнө гүүгээ барихаар гүү сааж сурах гэж байгаа. Уг нь ээж үхэр, гүүгээ саадаг байсан. Даанч ажилтай болохоор эгч бид 2 хурдан сурахгүй бол болохгүй” хэмээн гурвуулаа нийлж гэрийнхээ ажлыг нугална. Хөдөөгийн ажилсаг хүүхдүүдийн сурвалжилгыг та бүхэндээ хүргэж байна.